Idinto a naregkasen dagiti pisikal a barikada, intultuloy dagiti agproprotestar kontra iti inaprobaran ti gobierno a mining exploration iti Dupax del Norte, Nueva Vizcaya babaen ti panangibarikadada a mismo iti bagbagida.
Daytoy ti nangtignay ken ni Judge Paul R. Attolba Jr. ti Regional Trial Court (RTC) Branch 30 ti Bayombong, Nueva Vizcaya a mangipaulog iti sabali pay a pammilin a nangmandar kadagiti court sheriff ken ti Philippine National Police (PNP) a mangipila iti darum maibusor kadagiti aglabsing, kas iti contempt of court.
Nagtignay ni Judge Attolba segun iti report ti sheriff a nangipakaammo iti korte a nupay inikkate dagiti agprotprotestar dagiti pisikal a barikada nga imbangenda iti kalsada a sumrek iti Sitio Keon, Brgy. Bitnong, Dupax del Norte (a maysa kadagiti paset a pakaisayangkatan ti mining exploration), nangbukelda iti human barricade tapno lapdanda ti iseserrek dagiti empleado ken kontraktor ti Woggle Corporation, ti ganggannaet a kompania nga agpanggep nga agminas iti lugar.
Inikkan ti Mines and Geosciences Bureau (MGB) ti Department of Environment and Natural Resources (DENR). ti Woggle idi Agosto 4, 2025 iti Exploration Permit No. 00030-II a a mangipalubos a sukisokenda ti nasurok a 3,000 nga ektaria a sakupen ti lima a barangay. Rinugian met a dagus ti Woggle dagiti aktibidadna.
Makabayan bloc, mangipila iti baro nga impeachment complaint kontra ken ni VP Duterte kalpasan ti one-year ban
Segun kadagiti rekord ti korte, rinugian dagiti agprotprotestar, nga indauluan ni Florentino Daynos, maysa a lider dagiti anti-mining a grupo iti lugar, ken dagiti kakaduana ti nangikabil kadagiti pisikal a barikada tapno malapdan ti exploration.
Maibatay iti sheriff’s report, impaganetget ti RTC ti saan a panangtungpal dagiti agproprotestar kadagiti pammilin nga impaulog ti korte.
Isut' gapuna nga iti baro a pammilinna, a napetsaan iti Enero 19, 2026, minandaran ni Judge Attolba ket nangiturong kadagiti court sheriff ken ti PNP a mangipatungpal kadagiti bilinna ken mangtiliw iti asino man a tao a manglaplapped iti Keon Barangay Road a mangiturong kadagiti lugar ti panagsukisok iti panagminas.
Kinuna ni Judge Attolba kadagiti sheriff ken iti PNP: “Ipatungpalyo ti writ arrest, a di kasapulan ti adu pay nga pammilin ti korte, maibusor iti asino man a tao nga agkedked, mangtubngar, manglapped wenno mangsupiat iti pannakaipatungpal ti writ, ta kasapulan dayta panangarestar tapno maipilit ti panagtulnog iti maysa a nainkalintegan a bilin ti korte, malapdan ti ikakaro ti panagsusupanget, ken tapno mataginayon ti talna ken urnos ti publiko.”
Kinuna ti korte a ti pannakabukel dagiti human barricade ket maysa a naipanurok nga aramid ti kinasukir ken nalawag a panangliklik iti autoridad ti korte.
Binilin ngarud ti korte dagiti sheriff a lasinenda ken idatagda iti Korte ti nagan ti amin a tattao a nanglapped wenno nangsupiat iti writ tapno maikkan iti maitutop a proseso para iti pannakaidarumda maigapu iti contempt of court.
Malaksid iti multa, mabalin a madusa iti pannakaibalud kadagiti tattao a makabasol iti contempt of court. (Rey G. Panaligan/MANILA BULLETIN)
