Naikeddeng a baro iti siensia ti manmano a kita ti agsabong a mula a masakaran iti Nueva Ecija.
Napanaganan iti Clerodendrum kelli iti sientipiko a pagiwarnak ti Philippine Taxonomic Initiative (PTI), daytoy ti baro a kita ti mula ti umuna a baro a Clerodendrum a mailadawan a manipud iti Filipinas sipud idi 1930, ket nagbalinen a 19 ti dagup a bilangda.
Inlawlawag ti pagiwarnak a ti Clerodendrum kelli ket maysa a bassit a mula nga agingga iti maysa a metro ti katayagna, nga addaan kadagiti natirad a bulong a berde iti ngato ken lilac iti babana, agraman dagiti puraw a sabongna nga addaan iti lima a petalo.
Nasalaw dagiti kameng ti PTI daytoy a kita ti mula bayat ti inwayatda a botanical expedition iti Pantabangan-Carranglan Watershed Forest Reserve (PCWFR) idi 2020. Napatalgedan,idi agangay a saan a nailadawan daytoy iti agdama a taxonomic account babaen ti panangidiligda kadagiti sibibiag a mula, nagango a herbarium specimen, ken naipablaak a ladladawan.
Kasapulan ti natibker ken nainkalintegan a pagtaktakderan iti parikut iti WPS --NMC
Nupay maibilang ti Clerodendrum kelli a baro iti siensia, bigbigen ti PTI a saan a ti bunggoyda ti immuna a nakatakuat iti daytoy. Impalgak ti pagiwarnak a dagiti natibo a Bugkalot nga agindeg iti PCWFR, ammoda idin daytoy a mula, nga isuda ti nangipatuldo iti pagtubtubuanna iti nalamiis a paset ti bantay ken ti pakausaran daytoy a pangagas kadagiti masakit nga aso.
Iti immuna a panangsukimat, naibilang ti Clerodendrum kelli a kas “critically endangered” gapu ta limitado laengen ti yanda ken adda pangta ti panagreggaay ti bantay ken panagbaliw iti pakausaran ti daga.
Ngem kas panangbigbig iti pannakaammo ken panangaywan dagiti Bugkalot, inagapad dagiti nagsukisok ti "kelli" a nagan iti Bugkalot, kas scientific epithet tapno maiparang ti nagakman dagiti katutubo ken forest reserve iti panangsalaknib iti naidumduma a biag ti mula iti Filipinas. (Philippine Taxonomic Initiative/Manila Bulletin//Lito Hilidon/Bannawag)
