Limned ti maysa a roll-on/roll-off (RORO) a barko iti baybay ti Basilan ita nga aldaw, Enero 26, a nakatayan ti 15 a pasahero, segun iti Philippine Coast Guard (PCG).
Segun iti report ti Coast Guard District Southwestern Mindanao (CGDSWM), limned itay 1:50 iti parbangon ti M/V Trisha Kerstin 3 nga agbiahe iti Jolo Sulu, iti agarup 2.75 nautical miles iti amianan a daya ti Baluk-Baluk Island iti Basilan.
Maibasar iti passenger manifesto, 359 a tattao ti nakalugan iti RORO nga imatmatonan ti Aleson Shipping, a buklen ti 332 a pasahero ken 27 a tripulante.
Kinuna ni CGDSWM Commander Romel Duwa a pimmanaw ti barko manipud iti Port of Zamboanga City idi 9:20 iti rabii ti Domingo, Enero 25, ngem saan nga "overloaded" daytoy. Adda met nakalugan a sea marshal ti PCG idi napasamak ti insidente.
Makabayan bloc, mangipila iti baro nga impeachment complaint kontra ken ni VP Duterte kalpasan ti one-year ban
Ngem kinuna ti PCG a naispalda ti agdagup 316 a nakalasat ken naalada ti 15 a bangkay, idinto a 28 ti mapukpukaw, a pakadagupan ti 359 a nakalugan iti barko.
Kalpasan a nakaawat iti distress call ti CGDSWM, binaonda a dagus ti BRP Tubbataha (MRRV-4401) manipud iti Zamboanga City.
Madama a maisaysayangkat ti search and rescue (SAR) operation idinto nga im-imbestigarendan ti nakaigapu iti pasamak.
Kinuna ni panakangiwat ti PCG Capt. Noemie Cayabyab nga imbestigarenda met daytoy a napasamak, ngem prioridadda ita ti panagresponde ta oras ti kamakamenda iti kastoy a situasion.
Bayat a masursurat daytoy a damag, kuna ti PCG nga awan ti nakitada nga oil spill iti lugar. (Martin Sadongdong/Manila Bulletin//Lito Hilidon/Bannawag)
