Duan ti impeachment complaint nga opisial a naipila iti Kamara kontra ken ni Presidente Marcos Jr., kalpasan a pormal nga inawat ni House Secretary General Cheloy Garafil ita nga aldaw, Enero 26 ti 37-panid nga impeachment complaint nga impila dagiti militante a grupo.
Personal nga inyeg da ACT Teachers Party-list Rep. Antonio Tinio, Gabriela Party-list Rep. Sarah Elago, ken Kabataan Party-list Rep. Renee Co ti maikadua nga impeachment complaint iti opisina ni Garafil.
Tallo ti articles of impeachment a dinakamat ti Makabayan bloc kontra ken ni Marcos: (1) Panangipasdek iti sistematiko a panagkunniber ken patronage, (2) Panangabuso iti Karbengan iti Unprogrammed Appropriations, ken (3) Direkta ken personal a pannakairaman kadagiti kickback scheme.
Nairaman kadagiti 36 a complainant da dati a Bayan Muna Party-list Rep. Neri Colmenares ken Teddy Casiño; dati a Gabriela Party-list Rep. Emmi de Jesus ken Liza Maza; ken ni Bayan President Renato Reyes.
Makabayan bloc, mangipila iti baro nga impeachment complaint kontra ken ni VP Duterte kalpasan ti one-year ban
Immunan a nangipila iti impeachment complaint ni Andre de Jesus kontra ken ni Marcos idi Enero 19, nga inyawat ni Garafil iti opisina ni House Speaker Faustino "Bojie" Dy III, kas paset ti proseso. (Ellson Quismorio/Manila Bulletin//Lito Hilidon/Bannawag)
