Iti panagsubli ti regular session ti Kongreso ita nga aldaw, Enero 26, tamingen a dagus ti Senado ti singasing nga Independent People’s Commission (IPC), ken dadduma pay a napateg a paglintegan a prioridadda, kuna ni Senate President Vicente “Tito” Sotto III.
Segun ken ni Sotto, kangrunaan a prioridad ti Senado ti Senate Bill No. 1512, ti linteg a mangitunda iti pannakabukel ti IPC, a saan laeng nga agpatingga iti anomalia ti flood control project, wenno iti DPWH (Department of Public Works and Highways) ti imbestigarenda, no di ket mairaman dagiti amin nga anomalia nga addaan iti panagkunniber.
Prioridad met ti Senado ti pannakarepormar ti party-list system ti pagilian (Senate Bill No. 192), ken ti gakat nga anti-political dynasty.
Inkeddengen ni Senate President Pro Tempore Panfilo “Ping” Lacson, daulo ti Senate Committee on Electoral Reforms and People’s Participation, ti hearing a maangay inton Enero 28, maipaay iti nadumaduma nga anti-political dynasty bill a naipila iti komite.
Barko a RORO nga addaan nasurok a 300 a pasahero, limned iti Basilan
Dadduma pay a prioridad a tamingen ti Senado ti Freedom of Information (FOI) bill, Classroom Acceleration Act, ken ti Philippine Geriatric Center (PGC) bill.
Tamingen ti Senate Committee on Agriculture, Food and Agrarian Reform, ken Finance and Ways and Means, ita nga aldaw dagiti gakat a mainaig iti kooperatiba iti agrikultura ken ti singasing a National Agriculture and Fisheries Extension System.
Inton Enero 27, pagsasaritaan ti Senate Committee on Health and Demography dagiti parikut iti palso ken saan a rehistrado nga ag-agas a mailaklako iti online ken kadagiti babassit a pagtagilakuan. (Hannah L. Torregoza/Manila Bulletin//Lito Hilidon/Bannawag)
