Mabalin a luktan manen ti Senado ti kaso nga impeachment a maibusor ken ni Bise Presidente Sara Duterte no anamongan ti Korte Suprema (SC) ti motion for reconsideration (MR) nga impila ti Kamara iti napalabas (maika-19) a Kongreso.
Daytoy ti kinuna ni Batangas 2nd district Rep. Gerville Luistro, daulo ti Committee on Justice ti Kamara, iti naangay a news forum iti ngudo ti lawas, kas sungbat iti saludsod no kasano nga apektaran ti panawen ti SC dagiti alagaden mainaig iti impeachment, nangruna no maipaulog ti pangngeddeng kalpasan dagiti petsa a padpadaanan ti Kamara ken Senado.
Iti maika-19 a Kongreso, ni Duterte ti umuna a bise presidente a ma-impeach iti historia ti pagilian idi inanamongan ti nasurok a kakatlo (1/3) dagiti kameng ti Kamara ti impeachment complaint a maibusor kenkuana idi Pebrero 5, 2025.
Ngem idi Hulio 2025, indeklarar ti SC ti impeachment complaint nga "unconstitutional."
Makabayan bloc, mangipila iti baro nga impeachment complaint kontra ken ni VP Duterte kalpasan ti one-year ban
Iti agdama (maika-20) a Kongreso, maipadpadamag nga agsagsaganan dagiti grupo a mangipila iti baro nga impeachment complaint kontra iti bise presidente mangrugi inton Pebrero 6, a panagpaso ti one-year bar a paglintegan.
Segun ken ni Luistro, no marisut ti SC ti MR inton Pebrero 7, depende latta iti agbalin a pangngeddeng ti kangatuan a pangukoman.
Inlawlawag ni Luistro a no saan a mapatgan ti MR, kaipapananna a masapul a tungpalenda ti rekititos ti notice of hearing nga insaad ti SC iti desisionda. (Ellson Quismorio/Manila Bulletin//Lito Hilidon/Bannawag)
