Pinili ni House Majority Leader Ilocos Norte 1st district Rep. Sandro Marcos ti saan a makiraman kadagiti amin a panagsasarita mainaig kadagiti agtarigagay a mangikkat iti amana, ni Presidente Marcos Jr., babaen ti proseso ti Konstitusion nga impeachment.
Iti maysa nga statement, kinuna ni Rep. Marcos ita nga aldaw, Enero 26, a saan a makiraman kadagiti diskusion, panagsasarita, ken iti proseso ti Committee on Rules ti Kamara mainaig kadagiti impeachment complaint, tapno masalakniban ti integridad ti Kamara, ti kredibilidad ti proseso, ken ti panagtalek ti publiko iti Konstitusional a sistema ti pagilian.
Ni Rep. Marcos ti daulo ti nabileg a rules committee ti Kamara, a mangyendorso iti impeachment complaint iti plenario ken iti Committee on Justice.
Daytoy a tignay ti mangitunda iti "initiation" wenno pannakairugi ti maysa nga impeachment complaint.
Makabayan bloc, mangipila iti baro nga impeachment complaint kontra ken ni VP Duterte kalpasan ti one-year ban
Kinuna ni Marcos a dakkel ti panagtalekna kadagiti kakaduana iti Kamara, a masapul a tungpalen ti Kamara ti annongenda nga awan ti mulit ti personal interest, ken tapno saanto a mapagduaduaan ti kinapatasna, ti kredibilidad ti proseso, tapno maiturong ti imatang ti publiko iti Konstitusion, iti kinapudno, ken iti panagturay ti linteg. (Ellson Quismorio/Manila Bulletin//Lito Hilidon/Bannawag)
