Pinaltogan ket napapatay ti maysa a federal immigration officer ti maysa a lalaki iti Minneapolis, Minnesota (Estados Unidos) idi Sabado, Enero 24, a nangpaadu pay iti ginasuten nga agproprotestar iti nasalemsem a kalsada ken nangparubrob iti risiris iti siudad.
Binigbig dagiti pamiliana ti lalaki a napaltogan a ni Alex Pretti, 37, agpapaay a nars iti intensive care unit a nagprotestar iti agtultuloy a kampania ni Presidente ti Estados Unidos Donald Trump a mangpugipog kadagiti imigrante iti nasao a siudad.
Napaltogan ni Pretti nasurok maysa a milia manipud iti lugar a nakapaltogan ni Renee Good, 37, idi Enero 7, a nangpasged iti nasaknap a panagprotestar.
Kalpasan ti pammaltog, naguummong dagiti nakaluksaw a tattao ket sinarangetda dagiti federal immigration officer a nagbatuta ken nagusar iti flash bang.
Makabayan bloc, mangipila iti baro nga impeachment complaint kontra ken ni VP Duterte kalpasan ti one-year ban
Tultulongan ti Minnesota National Guard dagiti lokal a polis segun iti bilin ni gobernador ti Minnesota Tim Walz, ket naisaadda iti lugar ti pammaltog ken iti maysa a federal a pasdek nga inaldaw a pagsisinnabatan dagiti agproprotestar ken dagiti opisial.
Segun ken ni Minneapolis Police Chief Brian O’Hara, limitado pay laeng ti impormasion nga iggemda mainaig iti nakaigapuan ti pannakapaltog ni Pretti.
Iti baet ti protesta, kinuna ni Senate Democratic Leader Chuck Schumer a saan a suportaran dagiti Democrat ti ania man a pondo para iti Department of Homeland Security (DHS). Gapu iti daytoy, dumakkel ti posibilidad a mabalin nga adda shut down iti gobierno inton Enero 30 no maibusen ti pondoda.
Iti laksid ti nalamiis a panawen, ginasut a tattao ti siuulimek a naguummong iti lugar a nakapasagan ni Pretti ken adda iggemda a karatula a nakaisuratan ti “Justice for Alex Pretti." (The Associated Press/Manila Bulletin//Lito Hilidon/Bannawag)
