Indagadag ti International Coalition for Human Rights in the Philippines (ICHRP) ken ni Presidente Marcos Jr. ita nga aldaw, Enero 26, a mangibabaet ken ibilinna koma ti nadaras a pannakawayawaya ti pito a residente a naarestar bayat ti "naranggas" a panangikkat dagiti autoridad iti imbalangan dagiti kontra iti panagminas iti Dupax del Norte, Nueva Vizcaya.
"Aw-awagan ti ICHRP ni Marcos Jr. ken ti gobierno lokal ti Dupax Del Norte a ruk-atanda koma dagiti pito a residente a naarestar. Saan nga agtalinaed ti internasional a komunidad nga agbuya lattan ken agtultuloy ti kampania tapno maisardeng ti panagminas ti Woggle iti Nueva Vizcaya," kinuna ti ICHRP.
Binabalaw ti ICHRP ti naranggas a pannakaarestar dagiti pito a residente ken kameng ti komunidad bayat ti panangibarikadada iti mismo a bagbagida iti dalan a sumrek iti exploration area ti Woggle iti Purok Keon, Brgy. Bitnong, iti Dupax del Norte idi Enero 23.
Kinondenar ti grupo ti nalabes a panangusar dagiti autoridad iti puersa iti insayangkatda nga operasion.
Makabayan bloc, mangipila iti baro nga impeachment complaint kontra ken ni VP Duterte kalpasan ti one-year ban
Kinemmeg dagiti polis ti Nueva Vizcaya ti daulo ti komunidad a ni Florentino Daynos II, agraman dagiti indigenous people (IP) a babbai a da Krislyn Pocday, Adela Modi, Analiza Baliao, Amelia Rabino, Janet Macario, ken Sonnette Nginsayan.
Segun iti ICHRP, gandat ti Woggle Corporation ti mangipatakder iti pagminasan ti balitok ken gambang a masarakan iti daga a kukua dagiti natibo iti Dupax del Norte, ket kunada nakaala ti Woggle Corporation iti exploration permit babaen ti panangallilaw kas iti panangalada iti pirma dagiti lokal a residente iti attendance sheet para iti ayuda ket inusarda daytoy kas pammaneknek iti Free, Prior, Informed Consent (FPIC)— a kalintegan dagiti katutubo.
Kuna ti ICHRP a ti panagbasak ti Woggle iti daga dagiti natibo iti Dupax Del Norte ti pammaneknek a panangsamsam dagiti imperialista a pagilian kadagiti metal ken mineral kadagiti pagilian a nabaknang iti rekursos, a masansan a mangusar iti legal a proseso (korte) ken ti puersa ti polis wenno militar tapno maipapilitda ti aktibidadda iti panagminas.
Idi Nobiembre 2025, impakdaar ni Bishop Jose Elmer Mangalinao ti Bayombong ti kumarkaro a pannakadadael ti ekolohia ken kiniddawda ken ni Presidente Marcos nga ipasardengna koma ti nasaknap a panagminas a pangta kadagiti kabakiran, karayan, ken komunidad nga agpannuray kadagitoy.
Ngem iti pannakasursurat daytoy a damag, sitatalinaed a naulimek ni Presidente Marcos mainaig iti isyu. (Jel Santos/Manila Bulletin//Lito Hilidon/Bannawag)
