In-dismiss idi Lunes, Enero 26, ti Office of the Provincial Prosecutor iti Bayombong, Nueva Vizcaya dagiti kaso nga impila dagiti kameng ti Philippine National Police (PNP) kadagiti inarestarda a pito nga umili a paset ti human barricade dagiti agprotrotestar iti Purok Keon, Brgy. Bitnong, Dupax del Norte, Nueva Vizcaya kontra iti mining exploration ti Woggle Corporation.
Iti napagtitipon a resolusion, imbatad ni Atty. Orville Ibarra, Prosecutor II, a na-dismiss dagiti kaso gapu iti kaawan ti umdas nga ebidensia, a dinakamatna ti kaawan ti nalawag a factual basis tapno maestablisar ti probable cause kontra kadagiti respondent.
Immuna nga inarestar ti PNP, a nangi-deploy iti ginasgasut a polis, ti innem a babbai, a nabigbig a kameng ti indigenous community iti lugar, ken maysa a lider ti anti-mining group a ni Florentino Daynos II, kalpasan nga inakusaran ida dagiti polis a linapdanda ti pannakaipatungpal ti writ of preliminary injunction ti korte gapu iti panangbukelda iti human barricade. Impaulog ni Judge Paul R. Attolba Jr. ti Regional Trial Court (RTC) Branch 30 ti nasao a writ, a nangipalubos iti Woogle Corporation nga itultuloyna ti mining exploration-na iti Puroko Keon, ken nangimandar iti pannakawaya ti ruta nga agturong iti exploration site ti kompania.
Nangipila ti PNP iti tallo a kaso kontra iti tunggal maysa kadagiti pito: direct assault, resistance and disobedience to an agent of a person in authority, ken obstruction, a kunada a naglabsing dagiti respondent iti pammilin ti korte ta nagaramidda iti human barricade.
Pangngeddeng ti ICC, kuestionaren ti kampo ni Duterte
Impaganetget ti resolusion ti piskalia ti kinaawan pannakasigurado iti eksakto a lokasion a nakaipatungpalan ti writ ti RTC, a kunana a saan a nalawag a naestablisar no ti kadi enforcement area ket paset ti barangay road network wenno iti kadi las-ud ti daga a kukua dagiti agprotprotestar ken dagiti mangsupsuportar kadakuada.
Napaliiw pay ni Atty. Ibarra a nupay adda naguummong a grupo, makuna a maysa daytoy a natalna a panangpeksa iti sentimiento–maysa nga aktibidad a maprotektaran iti babaen ti Konstitusion.
Imbilin ti piskalia ti madagdagus a pannakawayawaya dagiti amin a pito nga umili.
"Pammaneknek daytoy ti nakasaysayaat ken patas a pangngeddeng ken ipasingked daytoy a no adda hustisia, naragsak dagiti tattao ken nawatayo a mangirupir iti karbengantayo ken mangipaganetget iti sangalubongan a saantayo nga agbuteng iti ania man a karit kadatayo aglalo no daytoy ket pangilaban kadagiti dagdagatayo ken para kadagiti annaktayo ken iti sumaruno a henerasion. Maysa daytoy a dakkel a balligi para kadagiti environmental defenders ken anti-mining groups a mangsupsuportar kadatayo, panangabaktayo amin daytoy," kinuna ni Daynos.
Kalpasan ti pannakaibasura dagiti kaso nga inyuli ti PNP, nagsubli ti grupo dagiti pito iti Purok Keon ket nangangayda iti cañao—maysa a tradisional a ritual ti panagyaman dagiti katutubo kas tignay ti panagyaman iti desision ti piskalia ken tapno maselebraran ti pannakawayawayada manipud iti darum dagiti pannakabagi ti linteg. (Rachel Magday/DWRV/Kallikasan)
