Indagadag ti Second Congressional Commission on Education (EDCOM II) iti Department of Education (DepEd) a maipasardeng koma ti makunkuna a “mass promotion” a naipakadawyanen, nga impakdaarda a daytoy a polisia ti nangitunda iti pannakaibaba ti learner proficiency kadagiti kangrunaan a grade level.
Segun iti report ti EDCOM II mainaig iti basic education a naipablaak idi Enero 26, maitaltal-o wenno maipaspasa dagiti adalan a Filipino iti sumaruno a tukad nupay saanda pay a naan-anay a nasursuro ti agsurat, agbasa, ken agbilang.
Dinakamat ti EDCOM II ti resulta ti National Achievement Test (NAT) ken dadduma pay nga estandarte a panangtingiting, a nangipakita iti panagbaba ti kinalaing nga agbasa dagiti ubbing a naital-o kadagiti nangatngato a grado.
Impakita ti report a nupay 30 a porsiento kadagiti adalan iti Grado 3 ti maibilang a nalaing agingga iti nalaing unay, bumabbaba daytoy agingga iti Grado 6 nga addaan laeng iti 19.56 a porsiento ti nakaragpat iti lebel a nalaing, ket bumassit pay daytoy a bilang bayat a maital-o iti secondary school.
Gobierno ti Filipinas, saan a makibiang iti pre-trial proceedings ni Duterte iti ICC
Iti Grado 10 ken Grado 12, 0.74 a porsiento laeng ken 0.4 a porsiento dagiti estudiante ti nakaragpat iti kinalaing.
Segun iti EDCOM II, resulta daytoy ti panangital-o kadagiti ubbing iti sumaruno a tukad wenno grado uray bassit ti nasursuroda.
Insingasing ti EDCOM II a repasuen koma ti DepEd ti polisia mainaig iti panangital-o iti grado ken ti panagtalinaed iti isu met laeng a grado tapno maliklikan ti ad-adda a panagbaba ti resulta ti panagadal dagiti ubbing. (Jel Santos/Manila Bulletin//Lito Hilidon/Bannawag)
