Opisial a rinugianen ti Kamara -- a domdominaren dagiti kaaliado ni Presidente Marcos -- ti panangiwayatda iti proseso ti impeachment kontra iti presidente, kalpasan a nayawat ti dua a beripikado ken nayendorso nga impeachment complaint iti Committee on Justice idi rabii ti Enero 26.
Dagiti dua nga impeachment complaint -- nga inawat ni Secretary General Cheloy Garafil sa inyawatna iti opisina ni Speaker Faustino Dy III -- ti naikamakam a nainayon iti order of business iti plenario.
Naibasa dagiti dua nga impeachment complaint iti plenario sakbay nga inyawat ni Deputy Speaker Misamis Oriental 2nd district Rep. Yevgeny Vicente Emano iti Committee on Justice nga idadauluan ni Batangas 2nd district Rep. Gerville Luistro.
Dinakamat ti dua nga impeachment complaint ti panagkunniber iti binilion a pisos ti balorna a flood control project kas nadagsen a makagapu iti pannakaikkat ni Marcos.
Gobierno ti Filipinas, saan a makibiang iti pre-trial proceedings ni Duterte iti ICC
Naikkan ti House Speaker iti 10 a session day a mangyawat iti impeachment complaint iti plenario, idinto a tallo a session day ti naited iti Committee on Rules tapno yawatda ti impeachment iti Committee on Justice.
Naikkan ti Committee on Justice iti 60 a session day a mangangay kadagiti hearing tapno makitada -- babaen ti panagbotos dagiti kameng ti komite -- no "sufficient in form and substance" dagiti impeachment complaint.
No makitada a "sufficient" ti impeachment complaint, pagbobotosanda daytoy iti plenario, ket kasapulan ti 106 a botos (kakatlo ti bilang dagiti kongresman a 317) tapno maadaptar impeachment complaint, sa mayallatiw iti Senado nga agpaay a kas impeachment court.
Malaksid ti panagtulid ti proseso ti impeachment, maipakat metten ti one-year ban a paglintegan iti panangipila iti sabali pay nga impeachment complaint kontra ken ni Marcos.
Kayatna a sawen, awanen ti maawat nga impeachment complaint a maibusor ken ni Marcos agingga inton Enero 27, 2027, no bilang ta ma-dismiss ti agdama nga impeachment complaint iti Kamara.
Nupay kasta, saan pay nga ammo no ipalubos dagiti mayoria a kongresman a kaaliado ni Marcos nga agballigi ti impeachment kontra kenkuana. (Ellson Quismorio/Manila Bulletin//Lito Hilidon/Bannawag)
