Saan a makibiang ti gobierno ti Filipinas iti pre-trial proceeding nga isayangkat ti International Criminal Court (ICC) mainaig ken ni dati a presidente Rodrigo Duterte.
Daytoy ti kuna ti Malakanyang ita nga aldaw, Enero 27, kalpasan a naiwaragawag ti pangngeddeng ti Pre-Trial Chamber 1 ti ICC a kabaelan ni Duterte ti sumango iti pannakausig, a nangitunda iti pannakaituloy ti confirmation of charges hearing inton Pebrero 23.
Segun ken ni undersecretary ti Presidential Communications Office (PCO) Claire Castro, ti laeng ICC ti addaan iti hurisdiksion iti daytoy a banag.
Kuna ni Castro a raemen ni Presidente Ferdinand R. Marcos Jr. ti proseso ti internasional a pangukoman.
Pangngeddeng ti ICC, kuestionaren ti kampo ni Duterte
Innayon ni Castro nga awan ti panggep ti presidente a makibiang iti kaso, ket italeknan daytoy iti proseso ken paglintegan ti ICC.
Itay kallabes, kiniddaw dagiti abogado ni Duterte ti indefinite adjournment ti pannakataming iti kaso ni Duterte, agraman ti confirmation hearing, gapu iti medikal a kasasaad daytoy.
Ngem kasungani daytoy ti natakuatan dagiti tallo nga independent medical expert, a nagkuna a "fit to stand trial" ni Duterte.
Ti confirmation hearing a naangay koma idi Septiembre 2025 ti mangikeddeng no adda umdas nga ebidensia a pamatian a pudno a naaramid ni Duterte dagiti krimen a nakaidarumanna. (Ruth Abbey Gita-Carlos/PNA//Lito Hilidon/Bannawag)
