Indauluan ni First Lady Liza Araneta-Marcos ti seremonia ti panangyawat kadagiti kaar-aramid a pagtagilakuan iti igid ti Pasig River Esplanade idi Enero 27, a mangipaay iti adu a gundaway kadagiti micro, small, and medium enterprises (MSMEs) ken mangidur-as iti programa ti gobierno a mangpapintas manen iti Pasig River.
Paset daytoy ti Pasig Bigyang Buhay Muli (PBBM) Project, maysa kadagiti kangrunaan a programa ti administrasion ni Presidente Marcos tapno pumintas manen ti historikal a Pasig River ket agbalin a sentro ti kultura, paglingayan, ken turismo.
Pormal a nayawat kadagiti agtagtagilako ti 47 a puesto a pagtagilakuan ken 18 a babassit a siled para iti 22 a negosio, tapno maaddaanda iti natalged, natibker, ken naurnos a puesto iti esplanade.
Malaksid iti pagbiagan ken turismo, suportaran daytoy ti programa ti administrasion a mangsalaknib iti Pasig River babaen ti nasaysayaat a panangiwardas kadagiti basura.
Filipinas, China, pagsaritaanda dagiti parikut iti South China Sea
Ipatpatungpal ti Pasig River Esplanade ti “clean-as-you-go” a paglintegan, agraman ti umisu a panangilasin kadagiti basura ken sistema ti panangibelleng.
Inaldaw a silulukat ti Pasig River Esplanade iti publiko, idinto nga agpaut ti panagtagilako manipud 4:00 iti malem agingga iti tengnga ti rabii. (Argyll Cyrus Geducos/Manila Bulletin//Lito Hilidon/Bannawag)
