Narigat nga ipatungpal ti Anti-Political Dynasty Law para iti mapasungad a 2028 national ken local election.
Daytoy ti kapanunotan nga imbinglay ni daulo ti Comission on Elections (Comelec) George Erwin Garcia iti panangrugi ti hearing nga insayangkat ti Committee on Suffrage and Electoral Reforms ti Kamara idi Enero 27, mainaig kadagiti naipila nga anti-political dynasty bill.
Ti tiempo ti makitkitana a parikut, gapu ta mano laengen a tawen ti palabsen sakbay ti panagbobotos iti Mayo 2028.
Segun ken ni Garcia, bassiten ti panawenda a mangaprobar iti Anti-Political Dynasty Law, ta maysa tawen ken innem a bulan laengen ti natda sakbay ti panawen ti panangipila iti kandidatura para iti eleksion 2028, ta masapul a yimplementar daytoy ti Comelec inton 2028.
Filipinas, China, pagsaritaanda dagiti parikut iti South China Sea
Masapul a maisaad iti singasing a linteg dagiti sakupen ti pannakadiskualipikar wenno pannakakanselar ti kandidatura dagiti agngayangay nga opisial, maibasar kadagiti remedio a naisingasing kadagiti 21 a bersion anti-political dynasty bill a naipila iti komite.
Kinuna ni Garcia a saan a mabalin a diskualipikaren wenno waswasen a dagus ti Comelec dagiti kandidato, uray nalawag a saanda a kualipikado maibasar iti ammo ti publiko. Masapul nga awaten ti Comelec amin a certificates of candidacy (COC).
Inlawlawag ni Garcia nga agkasapulan iti naan-anay a hearing kadagiti kastoy a kaso ti pannakadiskualipikar wenno pannakawaswas ti kandidatura, ta masapul a mapaneknekan a pudno nga agkabagian ti kandidato ken ti agdama nga opisial.
Insingasing ni Garcia a ti mabalin a pamuspusan ket ti pannakaisakbay ti aldaw ti panangipila iti COC, kas koma iti Hulio 2027, ngem basbassit a tiempo met ti maipaay iti Kongreso a mangtaming iti narikut a gakat.
Inkeddeng ni daulo ti komite Lanao del Sur 1st district Rep. Zia Alonto Adiong ti sumaruno a hearing-da iti anti-political dynasty bill inton Pebrero 10. (Ellson Quismorio/Manila Bulletin//Lito Hilidon/Bannawag)
