Makipaset dagiti nagbalin a biktima ti napeggad nga anti-drug campaign iti Filipinas iti confirmation of charges a maibusor ken ni dati a presidente Rodrigo Duterte nga iwayat ti ti International Criminal Court (ICC) manipud Pebrero 23 agingga 27.
Maibasar iti pangngeddeng ti Pre-Trial Chamber I idi Enero 26, natakuatanda a kabaelan ni Duterte ti makipaset iti pre-trial proceeding ken inlaksidda ti kiddaw ti depensa a maisardeng koma ti pannakabista ti kaso ni Duterte.
Daytoy ti nangitunda iti pannakaituloy ti confirmation of charges hearing, a pangkitaan dagiti hues no umdas met laeng dagiti ebidensia a mangpaneknek a naaramid ni Duterte ti krimen a nakaidarumanna.
Kuna ti ICC a mapalubosan dagiti biktima ti drug war ni Duterte a mangidatag iti kapanunotan ken pakaseknanda kabayatan ti hearing babaen dagiti abogadoda.
Filipinas, China, pagsaritaanda dagiti parikut iti South China Sea
Agpaay a kas abogado dagiti biktima da Joel Butuyan ken Gilbert Andres, a kaduada ti maysa pay nga abogado manipud iti Office of Public Counsel for Victims (OPCV).
Imbilin ti Pre-Trial Chamber I (PTC 1) ti pannakaisagana ti special medical accommodation para ken ni Duterte ken pormal a nangikeddeng iti uppat nga aldaw a maangay a confirmation of charges hearing, nga addaan iti nainget a limitasion kadagiti aldaw ti panangbista ken ti kaatiddog ti session, tapno makedngan ti aldaw a panagbannogna.
Segun iti PTC 1, maikkan iti ad-adu nga oras ti depensa a mangipresentar iti ebidensiada, idinto a naikkanen iti gundaway ti Prosecution a mangidatag iti kasoda iti PTC 1 babaen dagiti dokumento, kas panangannurot iti prinsipio ti kinapatas ken panagpapada. (Argyll Cyrus Geducos/Manila Bulletin//Lito Hilidon/Bannawag)
