Nairekord ti Metro Manila ti kalammiisan a temperatura ita a panawen ti amian (northeast monsoon) a dimmanon iti 19.2 degrees Celsius (°C) ita nga aldaw, Enero 29, segun iti Philippine Atmospheric, Geophysical and Astronomical Services Administration (PAGASA).
Nairekord daytoy a temperatura iti Science Garden monitoring station iti Quezon City a nababbaba ngem iti 19.6°C a nairekordda idi Enero 22.
Nupay kasta, adayo pay daytoy iti kalammiisan a temperatura a nairekord iti Metro Manila a 14.5°C idi Enero 11, 1914 iti Port Area iti Manila.
Malaksid iti Metro Manila, nairekord iti siam a lugar ti nalam-ek a panawen ita nga aldaw, kas iti Baguio City, Benguet (12.4°C); Basco, Batanes (18°C); Tanay, Rizal (18.2°C); Malaybalay, Bukidnon (18.6°C); Sinait, Ilocos Sur (19.2°C); Laoag City, Ilocos Norte (19.3°C); Abucay, Bataan (20.1°C); Calayan, Cagayan (20.1°C); ken Mulanay, Quezon (20.1°C).
'Natibker, diplomatiko' a wagas iti panangsaranget iti China, anamongan ni Marcos
Segun ken ni PAGASA weather specialist Chenel Dominguez, ekspektaren latta ti nalamlam-ek a tiempo iti sumagmamano a paset ti pagilian gapu iti panagsaknap ti amian, nangruna iti Luzon ken Visayas.
Yeg ti amian ti naulep a tangatang ken arbis iti lugar ti Cagayan Valley, Aurora, ken Quezon iti las-ud ti nasurok a 24 nga oras. (Ellalyn De Vera-Ruiz/Manila Bulletin//Lito Hilidon/Bannawag)
