Nagkaykaysa ti Korte Suprema (SC) a pinal a nangilaksid iti motion for reconsideration (MR) nga indatag ti Kamara mainaig iti panangideklarar ti SC nga "unconstitutional" ti impeachment complaint a maibusor ken ni Bise Presidente Sara Duterte.
Segun iti Office of the Spokesperson ti SC, inkeddeng ti kangatuan a pangukoman a maipariten ti pannakayallatiw ti maikapat nga impeachment complaint iti Senado idi Pebrero 5, 2025 kas maitunos iti Article XI, Section 3, subsection (5) ti Konstitusion.
Indeklarar ti SC nga immediately executory ti pangngeddengda ken saandan nga agawat iti dadduma pay a maidatag.
Iti pangngeddeng ti SC idi Hulio 25, 2025 nga insurat ni Senior Associate Justice Marvic M.V.F. Leonen, kinuna ti SC a linabsing ti impeachment complaint ti kalintegan ni Duterte iti due process a nailanad iti Bill of Rights.
'Natibker, diplomatiko' a wagas iti panangsaranget iti China, anamongan ni Marcos
Ngem inlawlawag ti SC iti desisionda a saanda nga inabsuelto ni Duterte iti ania man a pammabasol kontra kenkuana, ngem mabalinen ti mangidatag iti sabali nga impeachment complaint mangrugi inton Pebrero 6, 2026.
Iti kaudian a pangngeddeng ti SC, nangipaulogda kadagiti pagannurotan a masapul a tungpalen tapno masigurado ti kinapatas iti proseso ti impeachment, agraman ti pannakaipaay iti kopia ti Articles of Impeachment ken ebidensia, ken pannakaipaay iti nainkalintegan a panawen a mangsungbat iti daytoy. (Rey G. Panaligan/Manila Bulletin//Lito Hilidon/Bannawag)
