Suportaran ni Presidente Ferdinand R. Marcos Jr. ti natibker ken diplomatiko a wagas iti panangtaming iti kumarkaro a panagsinnungbat dagiti opisial ti Filipinas ken ti China mainaig iti panagsusupiat iti West Philippine Sea (WPS), segun iti Malakanyang ita nga aldaw, Enero 29.
Segun ken ni undersecretary ti Presidential Communications Office (PCO) Claire Castro, ammo ni Marcos ti mapaspasamak a panagsinnungbat dagiti opisial ti Filipinas ken iti Embahada ti China, a nangitunda iti singasing nga ideklararda a "persona non grata" dagiti dadduma nga embahador ti China.
Kinuna ti Department of Foreign Affairs (DFA) a ti pannakaideklarar a persona non grata iti maysa a tao ti kadagsenan a kita ti diplomatiko a tignay a mabalin nga ipakat ti gobierno kontra iti ganggannaet a kameng ti diplomatiko, ket daytoy koma maudi a pamuspusan.
Kinuna ti DFA a silulukatda latta a mangipaay iti gundaway a mangrisut iti saan a panagkikinnaawatan babaen ti pannakiuman, ket kunada a kapatpatangdan ti gobierno ti China mainaig kadagiti bilateral ken internasional a parikut a pakaseknan unay ti Filipinas.
Korte Suprema, pinatalgedanda ti pangngeddengda iti impeachment complaint kontra ken ni VP Duterte
Segun ken ni Castro, kayat ti presidente nga agtalinaed ti gobierno a natibker ngem iti diplomatiko a wagas.
Itay nabiit, bimmara ti panagsinnubang ti Embahada ti China ken dagiti opisial ti Filipinas gapu iti panangbabalaw ti China ken ni panakangiwat ti Philippine Coast Guard (PCG) para iti WPS Commodore Jay Tarriela ken dadduma pay a senador a nangbabalaw iti panangserrek ti China kadagiti mapagsusupiatan a teritorio. (Darryl John Esguerra/PNA//Lito Hilidon/Bannawag)
