Kinondenar ti Malakanyang ti pannakaipablaak ti napartuat a medikal a dokumento a siuulbod a nanginaig ken ni Presidente Marcos Jr., nga inawaganda a makadadael ken imballaagda ti posible a legal nga aksion kontra kadagiti agiwarwaras iti palso a rekord.
Kinuna ti Presidential Communications Office (PCO) idi Enero 28 a palso ti maipagarup a medikal a dokumento a maiwarwaras iti internet, ket saan a nagtaud iti lehitimo a medikal nga eksamenasion ti presidente, ken saan a mangipakita iti agdama a kasasaad ti salun-at ti presidente.
Ita a lawas, naipatulod kadagiti kameng ti Malacañang Press Corps ti mensahe iti email ken Viber manipud iti agnagan iti “Naman S. Puri” nga agkunkuna a kimmaro ti kasasaad ti salun-at ti presidente gapu iti panagusarna iti droga.
Segun iti Malakanyang, nasayaat ti kasasaad ti salun-at ni Marcos, ket kabaelanna a tungpalen ti trabahona, ken dagiti annongenna.
'Natibker, diplomatiko' a wagas iti panangsaranget iti China, anamongan ni Marcos
Pinatalgedan ti St. Luke’s Medical Center a palso ti medical test result nga agwarwaras iti internet ken iti social media, nga agkunkuna a kukua ni Marcos daytoy.
Impaganetget ti St. Luke’s Medical Center a nainget ti panangannurotda iti data privacy ken confidentiality ti pasienteda, ta mairuar laeng dagitoy no adda pammalubos ti pasiente.
Ad-adalen ita ti Malakanyang no ania dagiti mabalin a legal nga aksion a maipakat kontra iti panagwaras ti palso a dokumento ken impormasion. (Argyll Cyrus Geducos/Manila Bulletin//Lito Hilidon/Bannawag)
