Nupay dimmatag ni dati a kongresman Zaldy Co iti Korte Suprema (SC) tapno lapdanna ti panangusig kenkuana ti Office of the Ombudsman (OMB), kinuna ni Assistant Ombudsman Mico Clavano a taktika laeng ni Co daytoy tapno maitantan ti kasona.
"Saan a masinga ti Office of the Ombudsman kadagiti taktika a panangitantan a nairanta a mangtaktak iti pannakaimbestigar iti illegal ken rinuker nga aramid ni Co," kuna ni Clavano.
Iti petision ni Co iti SC a naipablaak ita nga aldaw, Enero 29, nagkiddaw ni Co iti temporary restraining order (TRO) a manglapped iti pannakaipatungpal ti resolusion ti Ombudsman idi Nobiembre 14, 2025, a nangibilin iti pannakaidarum ni Co, ken dagiti kakaduana, iti graft ken malversation of public funds iti Sandiganbayan.
Idi Nobiembre 21, imbilin ti Sandiganbayan ti pannakaaestar ni Co ken kadagiti 17 nga opisial ti Department of Public Works and Highways (DPWH) ken direktor ti Sunwest Corporation a naidarum iti graft ken malversation of public fund mainaig iti ₱289.5 a milion a flood control project iti Naujan, Oriental Mindoro.
'Natibker, diplomatiko' a wagas iti panangsaranget iti China, anamongan ni Marcos
Kalpasan a maipaulog ti warrant of arrest, indeklarar ti Sandiganbayan a pugante ni Co ken naibilin ti pannakawaswas ti pasaportena.
Idi Enero 8, 2026, saan a pinatgan ti Sandiganbayan ti motion for reconsideration nga impila ni Co babaen ti abogadona.
Itay nabiit, inkeddeng ti SC saan a maikari iti judicial relief dagiti maibilang a pugante kas iti manglikliklik iti pannakausigda ken dagiti manglibas kadagiti dusa a naipataw kadakuada, malaksid no agboluntarioda a sumuko.
Malaksid iti TRO, kiniddaw pay ni Co iti SC ti pannakawaswas dagiti kaso a maibusor kenkuana. Saan pay nga ammo no addan pangngeddeng ti SC mainaig iti daytoy. (Czarina Nicole Ong Ki and Rey G. Panaligan/Manila Bulletin//Lito Hilidon/Bannawag)
