Insubli ti Filipinas ken China ita nga aldaw, Enero 30, ti maysa kadagiti mapadpadaanan a panagsaritada -- maysa a politikal a panagpatang mainaig kadagiti parikut iti baybay ken dadduma pay a pakaseknan ti dua a pagilian -- kalpasan ti panangyebkasda iti tarigagayda a manggibus iti nabayagen a panagsusupiat iti South China Sea.
Ti Filipinas ti nangsangaili iti panagpatangda iti China bayat ti maang-angay a taripnong dagiti kameng ti Association of Southeast Asian Nations (ASEAN) iti Cebu.
Dimmar-ay iti bilateral discussion dagiti agkakangato nga embahador ti dua a pagilian a pakairamanan da Department of Foreign Affairs (DFA) Undersecretary for Policy Leo Herrera-Lim ken Assistant Secretary for Asian and Pacific Affairs Marshall Louis Alferez, kasta ni Chinese Foreign Ministry's Department of Boundary and Ocean Affairs Director-General Hou Yanqi.
Daytoy a panagpatang manen ti Filipinas ken China ti mangitunda iti napardas a pannakaanamong ti Code of Conduct (COC) iti South China Sea, nangruna ta immanamong ti sibubukel nga ASEAN, nga idadauluan ita ti Filipinas, ti pannakapapardas dagit negosasion.
Presidente Marcos, raemenna ti pangngeddeng ti SC iti kaso nga impeachment ni VP Duterte
Kuna ni DFA Secretary Ma. Theresa Lazaro a ti Filipinas ti mangsangaili iti binulan a taripnong ti technical working group (TWG) a napusgan a tumulong iti negosasion iti COC tapno napardas a malpas daytoy, idinto nga impalgak ni Chinese Ambassador in Manila Jing Quan itay kallabes a kayat a papardasen ti dua a pagilian ti panagsasarita. (Joseph Pedrajas/Manila Bulletin//Lito Hilidon/Bannawag)
