Impalgak ni Senate President Pro Tempore Panfilo “Ping” Lacson ita nga aldaw, Enero 30, a rumbeng a raemen ken awaten ti pangngeddeng ti Korte Suprema (SC) nga unconstitutional ti kaso nga impeachment ni Bise Presidente Sara Duterte.
Iti X (dati a Twitter) account ni Lacson, kinunana a masapul a raemen ken awaten ti pangngeddeng ti SC, anamongan man wenno saan, umisu man wenno biddut, nainkalintegan man wenno saan, perpekto man wenno depektibo, ta saan a naawagan a "didiosen ti Padre Faura" dagiti hues ti SC nga awan ti gapuna.
Segun ken ni Lacson, maiparbeng daytoy kas panangraem iti panagturay ti linteg, idinto a kastoy latta met ti pagtakderanna no bilang pinaboran ti SC ti motion for reconsideration ti Kamara.
Patien ni Lacson a ti SC ti maudi a mangikeddeng ken mangipatarus iti Konstitusion, ket mapukaw ti panagturay ti linteg no saan a suroten ti pangngeddeng ti SC iti kaso ti impeachment. (Hannah L. Torregoza/Manila Bulletin//Lito Hilidon/Bannawag)
