Impaganetget ti Malakanyang a nairanta a para laeng kadagiti commuter ken para pasahero a lugan ti EDSA Busway, bayat ti panangtamingna iti panagsasarita mainaig iti singasing a pannakaipalubos nga usaren dagiti pribado a lugan daytoy a dalan.
Segun ken ni undersecretary ti Presidential Communications Office (PCO) Claire Castro, ita nga aldaw, Enero 30, saan nga agsungani ti paglintegan ti Metropolitan Manila Development Authority (MMDA) ken ti Department of Transportation (DOTr) mainaig iti daytoy a banag.
Kuna ni Castro a nabatad no ania ti pakausaran ti EDSA Busway a maipaay kadagiti agluglugan a pasahero, ket ania man a panangbaliw iti daytoy ket masapul a maitunos iti pammilin ti presidente.
Kuna ni Castro a kinasaritan ti Malakanyang ni MMDA Chairman Don Artes tapno ilawlawagna dagiti report a panagduduma ti kapanunotan dagiti ahensia ti transportasion.
4 agingga 11 a bagyo, posible a sumrek iti PAR manipud iti Pebrero agingga iti Hulio --PAGASA
Kinuna ni Castro a personal a singasing laeng ni general manager (GM) ti MMDA Nicolas Torre III ti pannalukat ti EDSA Busway lane kadagiti pribado a lugan, ngem saan nga isu ti opisial nga ilunglungalong ti MMDA.
Innayon ni Castro nga agtignay laeng ti presidente kalpasan a maidatagen ti MMDA ti resulta ti panangadalda iti daytoy a banag. (Argyll Cyrus Geducos/Manila Bulletin//Lito Hilidon/Bannawag)
