Inwaragawag ni Senate President Vicente “Tito” Sotto III ita nga aldaw, Enero 30, suportaranna ti pannakabalbaliw ti Konstitusion (charter change) no maidatag daytoy a singasing iti Senado, gapu iti kairuruar a desision ti Korte Suprema (SC) a nangilaksid iti articles of impeachment ti Kamara kontra ken ni Bise Presidente Sara Duterte.
Iti maysa nga interbiu, kinuna ni Sotto nga ibilangna a judicial legislation ti pangngeddeng ti SC, ta binaliwandan ti wagas ti panangiwayat iti impeachment nga impaay ti Konstitusion, imbes nga surotenda ti proseso a nailanad iti linteg, idinto a saanda nga inatur ti factual error a naaramid dagiti hues ti SC.
Segun ken ni Sotto, saan a dinakamat ti Korte Suprema ti factual error a naaramidda iti immuna a desisionda.
Dinakamat ni Sotto a factual error ti kinuna ti SC iti immmuna a desisionda a nay-archive ti Senado ti kaso nga impeachment idi Pebrero 5, idinto a nay-archive daytoy idi Hunio idi napan a tawen, kalpasan ti sine die adjournment ti Kongreso.
4 agingga 11 a bagyo, posible a sumrek iti PAR manipud iti Pebrero agingga iti Hulio --PAGASA
Innayon ni Sotto a kasla bukbukod a binaliwan ti Korte Suprema ti proseso ti impeachment, ket inaramidda a narigrigat ngem iti nakalanad iti Konstitusion.
Kuna ni Sotto a mabalin nga agsarita ti Senado ken Kamara tapno pagsaritaanda daytoy nga isyu, ta isu laeng ti makitkitana a solusion, babaen ti Constituent Assembly, ta no saan a maaramid daytoy, dekada pay ti urayen sakbay nga agretiro dagiti agdama a hues ti SC sakbay nga agbaliw ti legal a kapanunotanda.
Segun ken ni Sotto, no mabalin met gayam nga amendaran ti Korte Suprema a bukbukodna ti Konstitusion, ad-adda pay ti kalinteganda nga amendaran daytoy ta ti Kongreso ti akinkarbengan iti panangbukel iti linteg.
Kuna ni Sotto a biangen ti Kongreso ti panangbukel iti linteg, saan a biang ti Korte Suprema, ket ti Constitutional Convention wenno Constituent Assembly ti mabalin nga usarenda, a saan a ti pangngeddeng ti Korte Suprema. (Dhel Nazario/Manila Bulletin//Lito Hilidon/Bannawag)
