Sinamsam ken dinadael dagiti autoridad dagiti mula a marihuana nga agbalor iti agarup ₱48.9 a milion iti kabambantayan a paset ti Sugpon, Ilocos Sur ken Kibungan, Benguet.
Kinompirmar ni Philippine Drug Enforcement Agency (PDEA) Regional Office I information officer Mariepe de Guzman ti operasion nga inwayatda idi Biernes, Enero 30, kalpasan ti nagsasaganad nga insayangkatda nga operasion manipud Enero 27 agingga 30 a kaduada ti Ilocos Sur Police Provincial Office ken lokal a polis.
Immuna nga insayangkatda ti operasion iti Barangay Licungan, Sugpon manipud Enero 27 agingga 28 a nakatakuatan ken nangdadaelanda iti 46,750 a puon a marihuana a nataraken iti nadumaduma a paset ti plantasion a mangsakup iti 10,450 square meter.
Idi Enero 28 agingga 29, adu pay a marihuana ti natakuatanda a mula iti 15,400 square meter a daga iti nagbedngan ti Barangay Licungan iti Sugpon ken iti Barangay Tacadang iti Kibungan. Agbalor daytoy iti ₱12.97 a milion.
TAO, LUGAR, PASAMAK: Sadiay Salomague
Naisayangkat ti maikatlo nga operasion manipud Enero 29 agingga 30 a nakadadaelan ti 126,900 a puon a marihuana, ken agarup 10 a kilo ti dried marijuana, iti 28,950 square meter a daga, nga agbalor iti ₱26.58 a milion.
Dinayaw ni PDEA-Ilocos Director Benjamin Gaspi ti operasion nga insayangkat dagiti nagtipon a pannakabagi ti linteg kas panagtungpal iti annongenda a manglapped kadagiti illegal a droga a makadanon iti komunidad ken kadagiti agtutubo. (Freddie Lazaro and Philippine News Agency/Manila Bulletin//Lito Hilidon/Bannawag)
