Angayen ti Armed Forces of the Philippines (AFP) ti agsasaruno a dadakkel nga aktibidad ti militar a kaduada ti Estados Unidos (US) iti West Philippine Sea (WPS) nga agpaut iti dua a bulan.
Kinompirmar ni Rear Admiral Roy Vincent Trinidad, panakangiwat ti AFP iti WPS, ita nga aldaw, Pebrero 3, a maangay ti panagsanay iti masakupan ti Filipinas nga exclusive economic zone (EEZ), nga addaan daytoy iti kalintegan ken hurisdiksion.
Mairaman daytoy nga aktibidad iti Notice to Airmen (NOTAM) nga agpaut manipud Enero 21 agingga Marso 31, a segun ken ni Trinidad, ket mangipakaammo iti AFP ken kadagiti kaalyadoda a mangisayangkat iti aktibidad kadagitoy a panawen.
Maysa a pakaangayan ti panagsanay ti pagsusupiatan a Bajo de Masinloc (Scarborough wenno Panatag Shoal), nga adda iti 120 nautical miles iti laud ti Luzon wenno iti uneg ti 200 nautical miles nga EEZ ti Filipinas. (Martin Sadongdong/Manila Bulletin//Lito Hilidon/Bannawag)
