Namakdaar ti Philippine Atmospheric, Geophysical, and Astronomical Services Administration (PAGASA) idi Pebrero 2 maipanggep iti agraraira ita iti social media a ti aphelion ti makaigapu iti nalamiis a paniempo.
Segun iti PAGASA, saan a ti kaadayo ti lubong iti init ti pakaigapuan dagiti agbaliwbaliw a paniempo.
Kinuna ti PAGASA a ti amian (northeast monsoon) ketdi ti mangyeg iti nalamiis ken namaga nga angin manipud kadagiti lugar iti East Asia nga addaan iti high pressure.
Inlawlawag ti PAGASA nga agdaliasat ti lubong nga aglikaw iti init babaen ti eliptiko a sukog ti orbit daytoy, isu nga adda dua a paset a makunkuna a perihelion ken aphelion.
Linteg a mangikkat ti travel tax, impila ni Rep. Marcos
Iti paset a kaasitgan ti lubong iti init (a naaramid idi Enero 4) ti makunkuna a perihelion, ti kaadayo a 147.1 a milion a kilometro.
Aphelion met ti paset a ti lubong ket kaasitgan iti init (a manamnama a maaramid inton Hulio 7), iti kaadayo a 152.1 a milion a kilometro.
Iti laksid daytoy a panagidiat, inlawlawag ti PAGASA a ti panagbaliw ti panawen ket apektaran laeng ti naglikig ti a pagtayyekan (axis) ti lubong, saan ketdi a ti kaadayo ti planeta iti init.
Indagadag ti PAGASA nga agridam koma ti publiko ket agannad kadagiti panangi-share kadagiti saan a napatalgedan nga impormasion iti internet, ken agpannuray laeng kadagiti opisial a paggapuan ti impormasion mainaig iti paniempo ken klima. (Ellalyn De Vera-Ruiz/Manila Bulletin//Lito Hilidon/Bannawag)
