Saan a rumbeng a mailaksid ti panagsisina ti bileg dagiti tallo a sanga ti gobierno ti Filipinas.
Daytoy ti kinuna ni Senior Deputy Majority Leader ti Kamara Iloilo 3rd district Rep. Lorenz Defensor idi Pebrero 2, maipapan iti nabiit pay nga impaulog a pangngeddeng ti Korte Suprema (SC) a nangpatalged iti deklarasionda nga unconstitutional ti impeachment complaint kontra ken ni Bise Presidente Sara Duterte.
"Adda panagsisina dagiti bileg a saan a rumbeng a sakupen ti nagbedngan ti tunggal maysa. Saan koma a serken ti departamento ti lehislatura ti beddeng ti hudikatura, kasta met ti hudikatura saanna koma a serken ti biang ti lehislatura ken ehekutibo," kinuna ni Defensor iti maysa nga interbiu.
Segun ken ni Defensor, saanen a masapul nga ipakitada ti kinaagwaywayasda iti Kamara, ta nabatad daytoy iti linteg, idinto nga awan ti makitana nga ania man a panangabuso ti Kamara iti karbenganna.
Linteg a mangikkat ti travel tax, impila ni Rep. Marcos
Nupay kinuna ni Defensor a raemen ti Kamara ti pangngeddeng ti SC, aklonenna a mariribukan unay iti imbilin ti SC nga ibilang ti Kamara dagiti session day kas gagangay a calendar day, ta dikdiktaranda metten dagiti kongresman no kasano a rumbeng nga ipatarusda ti session days, ken no kasano nga iwayatda ti proseso ti impeachment -- banag a saan a rumbeng nga isingsingasing ti SC nupay raemenda met dagiti proseso ti SC.
Nupay kasta, kinuna ni Defensor a masapul itan a mabaliwan dagiti pagalagadan ti Kamara iti proseso ti impeachment, ket siguraduenda a maitunos daytoy iti Konstitusion, ken iti gandat dagiti nangbukel iti Konstitusion. (Ellson Quismorio/Manila Bulletin//Lito Hilidon/Bannawag)
