Tamingen ti Korte Suprema (SC) inton Mierkoles, Pebrero 4, ti petision ni dati a kongresman Zaldy Co a nangkuestionar iti legalidad ti pannakaidarumna mainaig iti naanomalia a minilion ti balorna a flood control project iti Naujan, Oriental Mindoro.
Kinuna ni Co iti SC a saan nga inikkan ti Office of the Ombudsman iti due process iti panangipila daytoy iti kaso a graft ken non-bailable malversation of public funds kontra kenkuana iti Sandiganbayan idi Nobiembre 14, 2025.
Nagkiddaw ni Co iti SC a mangipaulog koma iti temporary restraining order (TRO) a mangpasardeng iti panangbista ti Sandiganbayan, agraman ti pannakawaswas dagiti kasona.
Sumagmamano nga abogado ti nagkuna a paset ti makunkuna a due process ti panangtaming ti SC iti petision ni Co iti full court session.
Linteg a mangikkat ti travel tax, impila ni Rep. Marcos
Ekspektarenda a bilinen ti SC ti Office of the Ombudsman nga agkomentar iti petision a mangilawlawag iti kasasaad ti kaso iti Sandiganbayan ken ti kasasaad ti warrant of arrest ni Co.
Kinuna ti dadduma pay nga abogado a bassit ti posibilidad a patgan ti SC ti kiddaw ni Co a TRO. (Rey G. Panaligan/Manila Bulletin//Lito Hilidon/Bannawag)
