Impaganetget ti hues ti maysa a regional trial court (RTC) iti Nueva Vizcaya a saan nga absoluto ti wayawaya iti panagsao ken saan a maipakat kadagiti panagsao a makasinga iti pannakaipaay ti hustisia wenno mangallukoy iti pananglabsing iti nainkalintegan a pammilin ti korte.
Nupay inaklon ni RTC Judge Paul R. Attolba Jr. a saan a mailaksid dagiti korte iti panangdillaw ti publiko kas paset ti demokrasia, kunana a no maibabain wenno awanen ti panagraem wenno maapektaranen ti panangipaay iti hustisia, mabalin nga usaren ti korte ti bilegna a mangi-contempt, kas panangsalaknib iti bagina.
Gapu iti daytoy, motu proprio (iti bukodna a ganuat) a binilin ni Attolba dagiti pito a tattao nga ilawlawagda (iti las-ud ti sangapulo nga aldaw manipud pannakaawatda iti pammilin a naipaulog idi Enero 28) no apay a saanda a rumbeng a mai-cite for contempt gapu iti saanda a panagraem wenno pananglabsingda iti pammilinna.
Pinaayaban ni J Attolba iti maangay nga indirect contempt hearing inton Pebrero 12 dagiti naawagan iti "Dupax 7" a da Florentino Daynos II, Janette Macario, Sonette Nginsayan, Adelia Modi, Crislyn Pocday, Analiza Balliao, ken Amelia Rabino.
Pope Leo XIV, sanguenna ti umuna a dakkel a parikut kadagiti tradisionalista a Katoliko
Isuda dagiti kinemmeg ti Nueva Vizcaya Philippine National Police (NV-PNP) idi Enero 23 a panangipatungpalda iti pammilin ti RTC a mangrakrak iti panangbarikada dagiti tattao iti maysa a kalsada ti Sitio Keon, Barangay Bitnong, Dupax del Norte nga agturong iti lugar ti mining exploration ti Woggle Corporation, maysa a kompania a Briton. Winayawayaan met la ida kalpasanna ti piskalia ti probinsia.
Segun iti kaudian a pammilin ni Attolba, siaammo ti korte a sakbay ti pannakaipatungpal iti writ of preliminary injunction, inawis ken inallukoy kano ni Daynos, maysa kadagiti respondent iti kaso kontra iti Woggle Corporation ken daulo dagiti mangbangbangen, babaen ti Facebook account-na dagiti dadduma pay a tattao wenno gunglo nga agtitiponda iti nadakamat a lugar ken makipagmaymaysada kano a mangsupiat ken manglabsing iti Writ of Preliminary Injunction nga impaulog ti korte.
Innayon ni Attolba a napaneknekan kano a dagiti inaramidda ket maibilang kano a panangsukir wenno pananglabsing iti nainkalintegan a pammilin wenno proseso ti korte, agraman ti di kano umno nga aramid a direkta wenno saan a direkta a manglapped wenno mangpakapuy iti pannakaipaay iti hustisia, ket madusa iti indirect contempt maibasar iti Section 3, Rule 71 ti Rules of Court. (Rey G. Panaligan/Manila Bulletin//Lito Hilidon/Bannawag)
