Ni House Majority Leader Ilocos Norte 1st district Rep. Sandro Marcos ti nangidatag iti gakat a linteg para iti madagdagus a pannakaikkat ti travel tax, a kunana a maysa a magpadpadagsen kadagiti Filipino.
Babaen ti House Bill (HB) No.7443 nga insingasing ni Marcos a mangikkat iti travel tax, maitandudo iti kalintegan dagiti Filipino nga agbiahe ken mangpasayaat pay iti ekonomia.
Segun ken ni Marcos, ₱2,700 ti travel tax iti first class nga eroplano ken ₱1,620 iti economy class. Apektaran daytoy dagiti pamilia a basbassit ti matgedanda, idinto nga umdas koman dagitoy a gatad nga igatangda kadagiti dadduma pay a kasapulanda.
Kinuna ni Marcos a nupay nabayagen a maysa a panguartaan ti gobierno ti travel tax, nagbalin met daytoy a maysa a makalapped iti panagpasiar.
Sen. Padilla, anamonganna ti panagbaliw iti liderato ti Senado no mayuli ti impeachment ni VP Sara
Innayon ni Marcos a ti pannakaikkat ti travel tax ti mangkissay iti gastuen iti panagbiahe ken mangallukoy kadagiti Filipino nga agpasiar iti pagilian ken iti ballasiw-taaw. (Ellson Quismorio/Manila Bulletin//Lito Hilidon/Bannawag)
