Napigsa a tudo ken angin ti marikna iti sumagmamano a lugar gapu ken ni Tropical Depression (TD) Basyang, segun iti Philippine Atmospheric, Geophysical and Astronomical Services Administration (PAGASA) ita nga aldaw, Pebrero 4.
Agpigsa ni Bagyo Basyang iti 55 a kilometro kada oras iti asideg ti sentrona, ken pugso nga aingga iti 70 a kilometro kada oras. Nasaripatpatan ti bagyo iti 895 a kilometro iti daya ti Northeastern Mindanao, sa agpalaud-abagatan a laud iti kapardas a 20 a kilometro kada oras.
Yeg ni Basyang ti bayakabak iti Eastern Samar, Southern Leyte, Dinagat Islands, Surigao del Norte, Surigao del Sur, Davao de Oro, ken Davao Oriental.
Napigsa nga angin ti marikna kadagiti lugar iti Mindanao a naipan iti Signal No. 1 kas iti abagatan a paset ti Surigao del Sur (Cagwait, Marihatag, San Agustin, Barobo, Tagbina, Hinatuan, Siudad ti Bislig, Lingig, Lianga).
Linteg a mangikkat ti travel tax, impila ni Rep. Marcos
Ekspektaren ti PAGASA a pumigsa pay ni Basyang bayat ti kaaddana iti Philippine Sea ket agbalin a tropical storm wenno naan-anay a bagyo inton Mierkoles.
Mabalin nga agdisso ni Basyang iti dayaen ti Mindanao wenno iti abagatan a paset ti Eastern Visayas inton Huebes (Pebrero 5) iti rabii, wenno iti agsapa ti Biernes (Pebrero 6).
Ni Basyang ti maikadua a bagyo a simrek iti Philippine Area of Responsibility (PAR) ita a tawen. (Ma. Cristina Arayata/PNA//Lito Hilidon/Bannawag)
