Maysa a kongresista a nainaig kadagiti naanomalia a flood control project ti nagikkat iti House of Representatives.
Impakaammo ni House Deputy Majority Leader Leyte 3rd district Rep. Anna Victoria Veloso-Tuazon, iti maysa a manipestasion bayat ti plenary session idi Mierkoles, Pebrero 4, a nagikkat ni ACT-CIS Party-list Rep. Edvic Yap.
"Mr. Speaker para iti impormasion ti kaaduan, nakaawatkami iti surat manipud ken ni Rep. Edvic Yap ti ACT-CIS Party-list a mangipakaammo iti Kamara dagiti Mangibagi iti panaglusulosna a kas kameng ti Kamara," kinuna ni Veloso-Tuazon.
"Itoy a panaglusulos ni Rep. Edvic Yap, kiddawenmi man iti Secretary General nga ikkatennan ni Rep. Yap iti listaan dagiti kameng ti Kamara dagiti Mangibagi," kinunana iti simmaruno a mosion.
Kiddaw ni Duterte a saan a dumar-ay iti confirmation hearing, sinupiat ti ICC prosecutor
Inanamongan met ti presiding officer a ni Deputy Speaker Lanao del Sur 2nd district Rep. Yasser Alonto Balindong, ti nasao a mosion kalpasan nga awan ti nangngegan a panagkedked manipud iti 300-kameng a Kamara.
Maekspektar a manginagan ti ACT-CIS Party-list iti nominado a mangsukat ken ni Yap.
Ni Yap ti vice chairman ti House Committee on Appropriations iti agdama a maika-20 a Kongreso.
Immunan a nangipaulog ti Court of Appeals (CA) iti freeze order kadagiti sanikua ni Yap ken ti kabsatna a ni Benguet Rep. Eric Yap. Segun kadagiti report, nainaig dagiti agkabsat iti Silverwolves Construction Corporation a mapapati nga adda iti likudan dagiti naanomalia a flood control project iti La Union. (Ellson Quismorio/MANILA BULLETIN)
