Inlawlawag ni daulo ti House Committee on Justice Batangas 2nd district Rep. Gerville Luistro a saan pay a teknikal a "natay" ti dua a kaso ti impeachment a maibusor ken ni Presidente Marcos Jr.
Idi Pebrero 4, indeklarar ti Committee on Justice ti Kamara nga "insufficient in substance" dagiti dua nga impeachment complaint, a nangilaksid iti kaso nga impeachment iti lebel ti komite.
Segun ken ni Luistro, kalpasan ti pangngeddeng ti komite, idatagda ti committee report iti plenario, ket mabalin a mabiag sadiay dagiti kaso nga impeachment, ngem adda kadagiti kongresman no tamingenda daytoy iti plenario.
Kuna ni Luistro a mabalin pay a mabaliwan ti pangngeddeng ti komite no tamingenda daytoy iti plenario ken adda kakatlo ti bilang dagiti kameng ti Kamara a mangbalusingsing iti pangngeddeng ti komite.
Melvin Matibag, baro a direktor ti NBI
No kastoy ti maaramid, kapilitan a mangaramid ti Committee on Justice iti articles of impeachment a maitunos iti pannakabalusingsing ti pangngeddeng ti komite, ket mayawat daytoy iti Senado a napusgan a mangisayangkat iti impeachment trial.
Agdagup iti 318 dagiti kameng ti Kamara iti maika-20 a Kongreso, kayatna a sawen, a 106 a kongresman ti kasapulan tapno mabalusingsing ti pangngeddeng ti komite.
Innayon ni Luistro nga isagananan ti committee report iti pannakawaswas dagiti dua a kaso ti impeachment sakbay ti sumaruno a hearing-da a maangay inton Pebrero 9. (Ellson Quismorio/Manila Bulletin//Lito Hilidon/Bannawag)
