Saan nga inanamongan ti Korte Suprema (SC) ti petision a nangkuestionar iti pannakabukel ti Independent Commission for Infrastructure (ICI) a mangimbestigar kadagiti anomalia iti flood control project ti gobierno.
Iti naangay a full court session idi Pebrero 4, inkeddeng ti SC a linabsing ti petision ti doktrina ti herarkia dagiti korte gapu ta direkta a naipila daytoy iti Kangatuan a Pangukoman.
Da Jacinto V. Paras, Manuelito Delos Reyes Luna, ken Atty. Ferdinand S. Topacio ti nangipila iti petision.
Iti resolusion nga insurat ni Associate Justice Samuel H. Gaerlan, kuna ti SC a nupay mapalubosan ti direkta a panagkamang iti SC kadagiti naidumduma a kaso, saan a nainkalintegan ti nagpetision ti pananglabasna kadagiti nababbaba a korte.
Kiddaw ni Duterte a saan a dumar-ay iti confirmation hearing, sinupiat ti ICC prosecutor
Segun iti SC, saan a naiparang dagiti nagpetision ti kaadda ti kontrobersia wenno aktual a kaso a nanglabsing iti legal a kalintegan.
Innayon ti SC a saan a naipakita dagiti nagpetision a nalabsing ti kalinteganda, wenno naapektaranda unay iti pannakabukel ti ICI.
Nabukel ti ICI babaen ti Executive Order (EO) No. 94 nga impaulog ni Presidente Marcos Jr. idi Septiembre 11, 2025 tapno maimbestigar dagiti anomalia iti flood control project ken dadduma pay nga infrastructure project ti gobierno iti naglabas a 10 a tawen manipud iti aldaw a pannakipaulog ti EO. (Rey G. Panaligan/Manila Bulletin//Lito Hilidon/Bannawag)
