Anamongan ti Commission on Human Rights (CHR) ti singasing a pannakaamendar ti Republic Act (RA) No. 9439, wenno ti Anti-Hospital Detention Law, tapno masinunuo a maitudo no asino ti mangsungbat ken madusa iti illegal a pannakaiditenar dagiti pasiente gapu iti saan a nabayadan nga obligasion iti ospital.
Iti position paper nga inruar ti CHR, impaganetgetda ti pakasapulan iti maitutop ken nadumaduma a kita ti panangdusa.
Inlawlawag ti CHR nga iti biang ti ospital, rumbeng a madusa dagiti mangar-aramid ken mangipatpatungpal iti paglintegan ti ospital, a saan ketdi a dagiti empleado a mangtungtungpal laeng iti paglintegan.
Tapno maikkan ti bileg ti linteg, insingasing ti CHR a marepaso pay koma a naan-anay dagiti probision maipanggep iti maipataw a dusa iti Section 3 ti paglintegan, a mangipataw iti dusa dagiti sinanakem ken siaammo a nanglabsing iti linteg, idinto a masalakniban dagiti empleado a nagtignay gapu iti naimbag a nakem wenno awanan ti karbengan a mangiruar iti pasiente wenno bangkay.
VP Sara, tinagibassitna ti impeachment complaint iti Kamara
Insingasing pay ti CHR a mairaman koma ti probision a manggarantia kadagiti biktima a makaala iti civil ken administrative remedy para iti danios.
Babaen ti panangpatibker iti RA 9439, kuna ti CHR a maliklikanen ti pannakaiditenar dagiti nakurapay a pasiente iti ospital gapu ta agtultuloy daytoy a mangimameg kadagiti marigrigat a pasiente iti tiempo ti panagsakit, panagsennaay, ken awan gawgawayda. (Czarina Nicole Ong Ki/Manila Bulletin//Lito Hilidon/Bannawag)
