Namakdaar ti Philippine Institute of Volcanology and Seismology (Phivolcs) iti posible a panagayus ti lahar ken dadduma pay a banag manipud iti Bulkan Kanlaon a gubuayen ti napipigsa a tudo yeg ni Bagyo Basyang iti Negros Island ken dadduma a paset ti Visayas.
Segun iti waragawag ti Phivolcs ita nga aldaw, Pebrero 6, kunada a mangpataud iti napeggad a lahar ti napigsa a tudo iti abagatan, laud, ken daya a darisdis ti Kanlaon, nga adda ita iti Alert Level 2.
Inlawlawag ti Phivolcs a mabalin a margaay dagiti napempen dagiti dapo ken dadduma pay nga inruar ti bulkan idi bimtak daytoy idi Oktubre 2025, a mangpataud met laeng iti lahar.
Kuna ti Phivolcs a mabalin a maapektaran iti lahar dagiti komunidad iti Bago City, La Carlota City, La Castellana, Moises Padilla ken San Carlos City iti Negros Occidental, agraman ti Canlaon City iti Negros Oriental, nangruna dagiti agindeg iti asideg dagitoy a karayan: Ibid River, Cotcot River, Talaptapan River, Malaiba River, Panubigan Creek, Buhangin–Indurayan River, Najalin River, Inyawan River, Maragandang River, Panun-an Creek, Intiguiwan River, Camansi River, Maao River, Tokon-tokon River, Masulog River, Binalbagan River, Taco Creek ken Linothangan River.
VP Sara, tinagibassitna ti impeachment complaint iti Kamara
Binallaagan ti PHivolcs dagiti residente iti nakuna a lugar a saganaanda ti posible a panagbakuit ken liklikanda ti agballasiw kadagitoy a karayan. (Ellalyn De Vera-Ruiz/Manila Bulletin//Lito Hildon/Bannawag)
