Adda posibilidadna a ma-impeach manen ni Bise Presidente Sara Duterte iti Kamara iti maikadua a gundaway inton Pebrero 9.
Daytoy ti kinuna ni Bicol Saro Party-list Rep. Terry Ridon kalpasan nga inyawat ni House Secretary General Cheloy Garafil ti dua a beripikado a nayendorso nga impeachment complaint iti opisina ni House Speaker Faustino "Bojie" Dy III idi Pebrero 5.
Segun ken ni Ridon, mairamanen ti dua nga impeachment complaint iti Order of Business iti plenario ti Kamara ken mabalinda nga aksionan inton Pebrero 9.
Ngem saan latta a mailaksid ti posible a panangyendorso dagiti kakatlo a bilang dagiti kameng ti Kamara iti articles of impeachment a maibusor iti bise presidente tapno direkta a maipan daytoy iti Senado, no la ketdi saan pay a nayawat dagiti kaso ti impeachment iti Committee on Justice ti Kamara.
VP Sara, tinagibassitna ti impeachment complaint iti Kamara
No mapasamak ti panangyendorso dagiti kakatlo a kameng ti Kamara inton Lunes, yawat laengen ti Committee on Rules, babaen ti plenario, ti dua a baro a kaso ti impeachment iti Committee on Justice ken rugiandan ti proseso ti impeachment.
No makalasat dagiti impeachment complaint iti Committee on Justice, tamingen ken anamonganda daytoy iti plenario sa mayawat iti Senado, kas iti gagangay a proseso.
Sumagmamano kadagiti nadakamat a reklamo iti naipila nga impeachment complaint ti maipagarup a di umno a panangusar ni Duterte iti ₱612.5 a milion a balor ti confidential fund ti opisinana (Office of the Vice President), ken idi nagpaay a daulo ti Department of Education. (Ellson Quismorio/Manila Bulletin//Lito Hilidon/Bannawag)
