Mapanen a 12 ti bilang ti tao a natay gapu iti Bagyo Basyang, segun iti waragawag ti Office of Civil Defense (OCD) idi Pebrero 8, kalpasan ti panangtingitingda kadagiti naapektaran a lugar.
Maibasar iti datos ti OCD, siam ti natay iti Northern Mindanao (Region 10), nga isu ti kaaduan ti natay gapu iti Bagyo Basyang.
Nasarakan a natayen ti biktima a nailista a mapukpukaw iti nargaay a daga, idinto a patpatalgedan pay laeng ti OCD ti report nga adda pay maysa a natay iti rehion.
Iti kallabes, kinuna ti OCD nga uppat a pamilia ti nagaburan iti panagreggay ti daga iti Cagayan de Oro City, Misamis Oriental idinto a tallo pay ti nailista a natay iti Iligan City.
Kiddaw ni Duterte a saan a dumar-ay iti confirmation hearing, sinupiat ti ICC prosecutor
Kinuna ni panakangiwat ti OCD Junie Castillo a madama pay laeng ti panangberipikar ti National Disaster Risk Reduction and Management Council (NDRRMC) kadagitoy a bilang.
Maibasar iti datos ti OCD, naapektaran ti 131,961 a pamilia (wenno 467,242 a tao) iti 850 a barangay iti Western Visayas (Region 6), Negros Island Region (NIR), Central Visayas (Region 7), Eastern Visayas (Region 8 ), Davao (Region 11), ken Caraga (Region 13).
Mapan a 5,818 a pamilia (16,297 a tao) ti nagtalinaed iti 337 nga evacuation center, idinto a 7,167 a pamilia (25,822 a tao) ti makaaw-awat iti tulong iti ruar ti pagbakuitan.
Nangipaayen ti gobierno iti agbalor ti ₱8.3 a milion a tulong kadagiti naapektaran a komunidad iti Western Visayas, NIR, Caraga, ken Davao. (Martin Sadongdong/Manila Bulletin//Lito Hilidon/Bannawag)
