Ita ta naipilan ti baro nga impeachment complaint kontra ken ni Bise Presidente Sara Duterte, manginanama ni Bicol Saro Party-list Rep. Terry Ridon a maibutaktaken ti kinasiasino ni "Mary Grace Piattos" agraman dagiti karkarna a nagnagan a nairaman iti anomalia iti confidential fund, gapu iti posible a panagtestigo ni Ramil Madriaga.
"No adda ammo ni Madriaga mainaig kadagiti palso a nagan, panawenen tapno maibutaktak ken malawlawaganen, aglalo ta saan a sungsungbatan ni Bise Presidente Duterte dagiti saludsod mainaig iti daytoy," kuna ni Ridon idi Pebrero 8.
Segun ken ni Ridon, daulo ti Committee on Public Accounts ti Kamara, napateg unay ti testimonia ni Madriaga iti pannakailawlawag no ania ti agpayso a napasamak iti agarup ₱612 a milion a confidential fund ti Office of the Vice President (OVP) ken ti Department of Education (DepEd) idi indauluan daytoy ni Duterte.
Ni Madriaga ti maigarup a dati nga intelligence officer ti naglabas nga administrasion ni Duterte, ken nangyam-ammo iti bagina iti media idi napan a tawen kas bag man ti bise presidente.
Melvin Matibag, baro a direktor ti NBI
Kinuna ni Madriaga a ti Philippine Offshore and Gaming Operators (POGO) ken drug dealer ti nangpondo iti panagkampania ni Duterte idi 2022.
Iti maysa a news forum idi Sabado, Pebrero 7, kinuna ti abogado ni Madriaga a ni Raymund Palad a sisasagana ti klientena a makipaset iti proseso ti impeachment kontra ken ni Duterte, kasta met iti Kamara, Senado, wenno Ombudsman no pormal a maikkan iti summon. (Ellson Quismorio/Manila Bulletin//Lito Hilidon/Bannawag)
