Impila ni Senador Francis Pangilinan ti resolusion ita nga aldaw, Pebrero 9, a mangkidkiddaw iti pannakaimbestigar iti pannakaipaulog ti exploration permit a nangipalubos iti mining activities iti Dupax del Norte, Nueva Vizcaya.
Panggep ti Senate Resolution (SR) No. 284 a palutpoten no kasano a naited ti exploration permit iti baet dagiti rumsua a pakaseknan iti pannakasalaknib ti aglawlaw, public consultation, ken ti pannakasalaknib iti kalintegan dagiti katutubo ken komunidad.
Kayat a maammuan ni Pangilinan, para iti panangbukel iti linteg, no ti pannakayimplementar ti DENR-MGB Exploration Permit No. EP 00003011 iti Dupax del Norte, Nueva Vizcaya ti nangpataud iti parikut iti environmental compliance, public consultation, ken FPIC requirements.
Dinakamat ti resolusion dagiti naireport a panaglabsing iti environmental ken procedural rules, agraman ti nagakman dagiti maseknan nga ahensia ti lokal ken nailian a gobierno iti panangtungpalda iti annongenda.
Melvin Matibag, baro a direktor ti NBI
Segun iti resolusion, ti exploration permit—a naipaulog idi August 2025—ti nangpalubos iti Woggle Corporation, maysa a kompania iti babaen ti nakabase iti Britain nga FCF Minerals Corporation, a mangiwayat iti exploration para iti gold, copper, ken zinc iti nasurok a 3,100 nga ektaria ti daga a sakup ti lima a barangay (Bitnong, Oyao, Parai, Munguia, ken Inaban) ti Dupax del Norte.
Kinuna ni Pangilinan a nagkiddaw ti dagiti kameng ti Sangguniang Panlalawigan ti Nueva Vizcaya iti DENR-MGB iti pannakawaswas ti permit gapu iti parikut iti aglawlaw, idinto a nagkiddaw met ti panagimbestigar dagiti opisial ti Barangay Oyao, Bitnong, Inaban, Munguia, ken dadduma pay a komunidad a naapektaran.
Dinakamat pay ti resolusion dagiti report dagiti residente a nangballaag iti dakes nga epekto ti panagminas a mangdadael iti aglawlaw, mula, ken pagalaan iti danum.
Kas panangsupiat dagiti residente ken katutubo iti panagminas, binangenanda dagiti dalan a pagserkan kadagiti exploration site.
Nupay kasta, impaulog ti regional trial court ti Nueva Vizcaya idi Oktubre 2025 ti temporary restraining order (TRO) a nangiparit iti pannakabangen dagiti kalsada a nangpataud iti riribuk ken pannakarakrak dagiti imbangen ti komunidad babaen dagiti polis ken tattao ti Woggle a binilin ti korte. (Wilnard Bacelonia/PNA//Lito Hilidon/Bannawag)
