Pardasan kadi, wenno naginad, ti Kamara iti panangtamingda iti maikadua a kaso nga impeachment a maibusor ken ni Bise Presidente Sara Duterte?
Daytoy ti dakkel a saludsod a masungbatan iti maangay a plenary session ita malem ti Pebrero 9, apaman a mairaman dagiti dua a nayendorso ken napatalgedan nga impeachment complaint iti order of business ti Kamara.
Dua a wagas ti mabalin a pakaanamongan dagiti kaso ti impeachment: Umuna, iti plenario, babaen ti panangyawat ti Committee on Rules kadagiti dua nga impeachment complaint iti Committee on Justice, ti komite a mangtaming iti kaso ti impeachment.
Kastoy ti napasamak idi napan a lawas a panangtaming iti dua nga impeachment complaint kontra ken ni Presidente Marcos, a nagtungpal iti pannaka-dismiss gapu iti insufficiency in substance.
Melvin Matibag, baro a direktor ti NBI
Maikadua, babaen ti panangyendorso ti kakatlo ti bilang dagiti kameng ti Kamara (105 ti 316 a kongresman) iti impeachment complaint ket mabalin a mangirugi iti proseso ti impeachment. No kastoy ti maaramid, mayallatiw a dagus iti Senado ti articles of impeachment.
Inaklon da Batangas 2nd district Rep. Gerville Luistro, Mamamayang Liberal (ML) Party-list Rep. Leila de Lima, ken Bicol Saro Party-list Rep. Terry Ridon a posible latta ti makunkuna a "fast-track" a wagas ti panang-impeach, nangruna ta kinompirmar ni Secretary General ti Kamara Cheloy Garafil a nayawaten ken ni House Speaker Faustino "Bojie" Dy III dagiti dua nga impeachment complaint kontra ken ni Duterte.
Itay Pebrero 8, saan nga ammo da Luistro, De Lima, ken Ridon no adda naiwayat a signature campaign para iti fast track a wagas ti pannakataming ti impeachment.
Ngem segun ken ni Luistro, masapul ti panagannad iti panangipakat iti fast-track mode.
Kuna ni Luistro a konserbatibo isuna nga abogado, ket salimetmetanna ti pagannurotan nga impaay ti Konstitusion ken ti resolusion ti Korte Suprema ngem saan a mailaksid ti kinaagwaywayas ti Kamara.
Iti sabali a bangir, kuna ni De Lima nga adda maal-alimadamadna a mangipila iti maikatlo nga impeachment complaint kontra ken ni Duterte ita nga agsapa ti Lunes. Ngem saan a lapped ti paglintegan ti Kamara a mairaman daytoy iti order of business iti plenario.
No maipan iti Committee on Justice dagiti dua nga impeachment complaint, mangikeddeng ti komite iti aldaw a pannakaangay ti public hearing tapno makitada no "sufficient in form and substance" met laeng dagitoy. (Ellson Quismorio/Manila Bulletin//Lito Hilidon/Bannawag)
