Kiniddaw dagiti abogado ni dati a presidente Rodrigo Duterte iti International Criminal Court (ICC) a mapalubosanda koma a mangnayon iti 78 nga ebidensia iti listaan dagiti ebidensia nga iparangda para iti confirmation of charges a maangay inton Pebrero 23, ket kunada a kasapulan la unay dagitoy nga ebidensia a mangkontra iti kaso ti prosecution.
Iti dokumento nga impila ni Nicholas Kaufman idi Pebrero 5, kiniddawna ti pammalubos ti Pre-Trial Chamber I (PTC 1) a nayonanda pay ti List of Evidence a maitunos iti Article 61(6)(c) ti Rome Statute ken iti Rule 121(6), ta nasken unay a mataming dagitoy nga ebidensia iti hearing.
Kiniddaw daytoy ti abogado ni Duterte kalpasan nga imparang ti prosecution ti 1,242 a kanayonan nga ebidensiada kalpasan a naitantan ti confirmation of charges hearing, a kaaduan kadagitoy ti maibilang a mabalin nga exculpatory evidence wenno napateg iti panagsaganada iti trial.
Segun ken ni Kauffman, naiparang ti 24 kadagiti naisingasing nga ebidensia a pangdepensada kalpasan ti orihinal a deadline iti panagilista iti ebidensia, idinto a nagbalin a napateg dagiti natda nga ebidensia kalpasan a naiparang kadakuada dagiti baro nga ebidensia.
Kiddaw ni Duterte a saan a dumar-ay iti confirmation hearing, sinupiat ti ICC prosecutor
Kinuna ni Kauffman a masapul nga agnayonda iti ebidensiada tapno naan-anay a masupiatda dagiti alegasion ti prosekusion inton confirmation of charges hearing.
Innayon ni Kauffman a no saan nga awaten ti PTC 1 dagiti inayonda nga ebidensia, ket maibilang a panagkitakit iti gundaway ken kalintegan ni Duterte a mangiparang iti kasona, idinto nga awan ti maapektaran a partido no maanamongan ti kiddawda. (Argyll Cyrus Geducos/Manila Bulletin//Lito Hilidon/Bannawag)
