Pimmusayen ni dati a House Speaker Jose de Venecia Jr. ita nga aldaw, Pebrero 10, iti tawenna a 89.
Imbati ni De Venecia ti kaingungotna a ni Pangasinan Rep. Gina De Venecia, ken dagiti bungada a da Christopher, Joey, Leslie Norton, Kristina Casimira Perez, Vivian Garcia, ken Alexandra Haner.
Nayanak ni De Venecia, a nalatak iti naganna a “Manong Joe," iti Disiembre 26, 1936 iti Siudad ti Dagupan, Pangasinan ken nagturpos iti De La Salle University-Manila, ken iti Ateneo de Manila University.
Nagpaay ni De Venecia iti pito a termino iti Kamara, ket lima iti daytoy ti panagpaayna a kas speaker, a namagbalin kenkuana a kabayagan a nagpaay nga speaker iti Kongreso kalpasan ti Maikadua a Gubat iti Sangalubongan.
Ni De Venecia ti mabigbigbig a nalatak a lider ti nabileg a partido a Lakas-Christian-Muslim Democrats (CMD).
TRO kontra iti proseso ti Kamara iti impeachment ni VP Duterte, kiniddaw dagiti abogado
Inyebkas ni Dagupan City Mayor Belen T. Fernandez ti panagladingitda iti ipupusay ni Manong Joe, ken nagyaman iti dakkel a tulong a naipaayna iti pannakaallangon ti Dagupan idi naapektaran daytoy iti ginggined idi 1990.
Maipakaammo ti detalye ti massayag ken pumpon ni De Venecia iti mabiit. (Liezle Basa Iñigo/Manila Bulletin//Lito Hilidon/Bannawag)
