Temporario a sinuspenso ti Department of Enviroment and Natural Resources - Mines and Geosciences Bureau (DENR-MGB) ti exploration permit ti Woggle Corporation iti gandat daytoy a naan-anay a mangminas iti nasurok a 3,000 nga ektaria iti lima a barangay ti ili ti Dupax del Norte, Nueva Vizcaya.
Segun iti surat ni OIC Director ti DENR-MGB Michael Cabalda ken ni Tommy E. Alfonso, presidente ti Woggle, a naipaskil ita a Martes, Pebrero 10, iti Facebook account ni Senador Erwin Tulfo, namandaran ti Woggle nga isardengna amin nga aktibidad ti exploration iti nasao nga ili.
Dinakamat ti DENR-MGB a kangrunaan a rason ti pannakasuspenso ti permit ti Woggle, maysa a ganggannaet a kompania ti panagminas, ti force majeure (saan a mapakpakadaan a pasamak a makatubeng iti maysa a panggep wenno aktibidad), kas sagudayen ti probision iti Philippine Mining Act of 1995 ken ti DENR Administrative Order No. 2010-21.
Mairaman iti pannakapagteng ti force majeure dagiti aramid wenno pasamak a saan a nainkalintegan a makontrol ti permit holder, kas koma iti riots, civil disturbance, blockades, ken pannakiriri kadagiti akinkukua iti daga.
Kiddaw ni Duterte a saan a dumar-ay iti confirmation hearing, sinupiat ti ICC prosecutor
Segun kadagiti report ken peksa ti adu nga umili, nagbalinen a nariribuk ti Dupax del Norte, lalo iti Purok Keon, Barangay Bitnong sipud impetteng dagiti umili, agtagikua iti daga, ken anti-mining groups a lapdan ti iseserrek ken panaggandat nga ag-drill ti Woggle. Nagkamang ti Woggle iti korte ket naikkan iti pammalubos nga ituloyda ti exploration activities-da uray adda dagiti barikada dagiti tattao.
Kimmaro ti situation iti lugar idi minandaran ti korte ti ginasgasut a polis a nangkadua kadagiti trabahador ti Woggle a nangdadael kadagiti barikada dagiti umili. Imbilin pay ti korte ti pannakakemmeg dagiti nangbangen a tattao ket indarum ken imbalud dagiti polis ti pito a tattao a nagbarikada (a pakairamanan ti innem a babbai, ken indigenous peoples). Winawayaan met laeng kalpasanna ti piskalia ti Nueva Vizcaya dagiti pito.
Kinuna ti surat ni Cabalda ken ni Alfonso nga adda agtultuloy a panangkontra ti komunidad iti dadduma a paset ti exploration area a nagresulta iti pannakaipasdek dagiti barikada kadagiti dalan a sumrek iti lugar ket nakaapektar daytoy iti seguridad ti publiko, kinaurnos ken kinatalna, a gapuna nga inkeddeng ken imbilin ti DENR-MGB ti suspension.
Nupay kasta, impaganetget met ti DENR-MGB a temporario laeng ti suspension ken saan a kanselasion daytoy.
Inyunay-unay met ti DENR-MGB nga agtalinaed a maipatungpal ti pannakasuspenso ti operasion ti Woggle agingga a saan a mapasardeng ti force majeure wenno dagiti makaigapu iti panangkontra dagiti umili iti panagminas iti lugarda.
Nagyaman met ni Sen. Tulfo iti MGB iti panangtamingda iti pakaseknan ti Dupax del Norte, kadagiti riribuk a mapaspasamak iti lugar, nga ingganetget ti senador a kasapulan a mataming iti privilege speech-na iti Senado idi Pebrero 2. (rva/Bannawag)
