Opisialen nga impakni dagiti kameng ti Kamara -- a kaaduanna ket kaaliado ti administrasion -- dagiti impeachment complaint a maibusor ken ni Presidente Marcos Jr. iti plenary session a naangay ita nga aldaw, Pebrero 10.
Sinuportaran ti mayoria a kongresman ti Committee Report No.111 nga indatag ti Committee on Justice a nangisingasing iti pannakawaswas dagiti dua a kaso ti impeachment a naipila kontra ken ni Marcos ita a tawen, gapu iti "insufficiency in substance."
Inanamongan ti 284 a kongresman ti pannakaswaswas dagiti impeachment complaint, idinto a walo ti saan nga immanamong ken uppat ti saan a nagbotos.
Kabayatan ti panangileppas ti Kamara iti kaso nga impeachment kontra ken ni Marcos, isagsagsanada a tamingen ti panaghtulid ti impeachment complaint kontra ken ni Bise Presidente Sara Duterte.
Dati a House Speaker De Venecia, 89, pimmusay
Ti panagbotos dagiti 284 a kongresman ket maysa a panangipakita dagiti mayoria a kaalyado ni Marcos iti pigsada, a kabaelanda nga alaen ti kakatlo a bilang dagiti kameng ti Kamara tapno direkta a mayallatiw ti impeachment complaint iti Senado.
Ita a Martes, Pebrero 10, tallon ti naipila a beripikado ken nayendorso nga impeachment complaint kontra ken ni Duterte a nayawat ken ni House Speaker Faustino "Bojie" Dy III. (Ellson Quismorio/Manila Bulletin//Lito Hilidon/Bannawag)
