Pinaritan ti gobierno ti China dagiti 16 nga opisial ti ili ti Kalayaan, Palawan a mapan iti mainland China, Hong Kong, ken Macao kas sungbat iti panamagbalinda a kas persona non grata iti ilida ken ni Embahador ti China iti Manila Jing Quan.
Daytoy ti inwaragawag ti embahada ti China iti Manila idi Pebrero 10, ta naibasar ti tignayda iti prinsipio ti panangsubad.
Segun iti embahada ti China, nangbukel iti resolusion dagiti opisial ti ili ti Kalayaan idi 2023 ken 2026 a nangideklarar iti embahador ti China a kas persona non grata sadiay, isu kas balesda, iparitda met a sumrek iti China agraman iti Hong Kong ken Macao dagiti 16 nga opisial ti Kalayaan a da Beltzasar S. Alindogan, Maurice Phillip Allexis S. Albayda, Nonelon B. Balbontin, Nonie C. Gapuz, Roberto M. Asiado, Hubert B. Llavan, Francis P. Polizon, Marilou S. Vales, Monico A. Abogado, Eugenio B. Bito-onon, Hermoso A. Ornopia, Tracylie Shierjun R. Malabayabas, ARzel E. Belidan, Vicencio R. Milan, Allan Dellosa, ken Mary Cristina J. Lagrosa.
Idi Enero 2026, impalgak ti Kalayaan, ti ili nga adda iti mismo a West Philippine Sea (WPS), a naideklarar a persona non grata ni Jing sadiay maipuon iti maipagarup a panaglabsingna iti diplomatic protocol gapu iti panagkiddawna a dusaen koma ti gobierno ti Filipinas ni Philippine Coast Guard spokesperson Commodore Jay Tarriela gapu iti ar-aramiden daytoy iti WPS. (Joseph Pedrajas/Manila Bulletin//Lito Hilidon/Bannawag)
