Dua a mabigbigbig a “living legends” ti Santa, Ilocos Sur ti pinadayawan ti gobierno probinsial babaen ti pannakaipaay kadakuada ti pammadayaw a Father Jose Burgos Award.
Napadayawan da Melita Galinato Valdez iti benneg ti Living Treasures ken Henry Bielza Ramos, iti Craftsmanship.
Napili a maipaayan iti pammaigbig ni Valdez kas kakaisuna a beterana nga umaabel iti Burda de Inabel a pagpampannakkel ti Santa, ken gapu iti panangtaginayonna itoy a nagtitinnawidan a talento dagiti umili.
Nalatak nga umaabel dagiti taga-Santa, a segun iti pakasaritaan, maysa daytoy a pagsapulan dagiti agindeg itoy nga ili sakbay pay ti yaay dagiti Kastila.
Narvacanean 'toy Miss Ilocos Sur 2026
Naipaayan met iti pammadayaw ni Ramos, a nalatak iti birngasna a “Maestro Henry," gapu iti naidumduma a kabaelanna kas mammanday, maysa a talento a tinawidna kadagiti tuodan a mammanday iti Santa.
Ti panagabel ken panagpanday ti dua kadagiti maibilang a kangrunaan a pamastrekan dagiti agindeg iti Santa. Adu kadagiti produktoda ti maibibiahe iti nadumaduma a rehion iti pagilian.
Segun ken ni Santa Mayor JJ Bueno III, adu payen dagiti agor-order iti abel ti Santa manipud iti ballasiw-taaw. (MARILYN C. CONTILLO)
