Naipaay ken ni Harmony Francisca Cabie-Quinto, dati a PRO ti GUMIL Metro Manila, ti Outstanding Chamber Leader Award iti national ken regional level ti Coalition of Filipino American Chambers of Commerce (COFACC) iti Estados Unidos iti seremonia ti pammadayaw a naangay iti Phoenix, Arizona idi Enero 31.
Ni Harmony, founding president ken chief executive officer ti Philippine American Chamber of Commerce of Southern Colorado (PACCSoCo) ken concurrent president ti Colorado State PACC, ti maysa kadagiti adigi ti Tindahang Filipino sa Colorado, maysa a grupo a pagkamengan ti nasurok a 4,000 a vendor ken consumer iti estado.
Itay napan a tawen, naipaay ken ni Harmony, iti umuna a gundaway, ti Chamber President of the Year Award, nakurang a makatawen kalpasan a naipaay kenkuana ti 2023 Modern Day Bayani (Hero) Award manipud iti National Federation of Filipino American Associations Region 5 .
Naipaay met ken ni kaingungotna a Chris, maysa a combat veteran iti Iraqi War, ti Individual Game Changer Award, pammadayaw a maipapaay kadagiti indibidual a pakakitaan ti naisangsangayan a nagapuananda iti tay-ak a paglainganda babaen ti inobasion, liderato, ken, masansan, iti isasayaat ti biag dagiti tattao, nga iti biang ni Quinto, naipakitana dagitoy iti panagpaayna iti Philippine American Chamber of Commerce.
Ombudsman Remulla, paspasungbaten ti Korte Suprema iti petision ni Zaldy Co
Napadayawan met ti PACCSoCo iti regional level a kas Chamber Community Impact Awardee ken Imagination and Innovation Awardee, bayat ti tallo-nga-aldaw a panagtitipon a naggibus idi Pebrero 1 a naangay iti Arizona.
Kas nangbuangay iti PACCSoCo, binangon ni Harmony ti maysa a non-profit organization a mangsuportar kadagiti Filipino-American businesses iti Southern Colorado ken nakaipaayan kenkuana ti "Small Business Champion of the Year" ken "AAPI Cultural Impact" awards iti 2025 International Asian American Business Expo.
Itay napan a tawen, naipaay ken ni Harmony ti 2025 Outstanding Chamber Leader of the Year Award iti regional level, nga itoy a tawen, napadayawan iti national level manipud iti COFACC “kas pammigbig iti naisangsangayan a lideratona, panangikumitna iti bagina pagsayaatan ti grupo, ken iti di matawaran a panagserbina iti chamber community iti Mountain ken iti West Coast Regions.”
Buklen ti Mountain West ken Pacific Region dagiti estado ti Arizona, Colorado, Idaho, Montana, Nevada, New Mexico, Utah, Wyoming, Alaska, California, Hawaii, Oregon, ken Washington.
“The awardee's guidance, vision, and commitment to advancing members and strengthening partnerships have created lasting impact and meaningful progress,” kinuna ti COFACC iti panangbigbigna ken ni Harmony, nga iti naminsan, isuna ti kaubingan a regular member ti National Press Club iti tawenna a 14 idi adda iti maikadua a tawenna iti high school iti Saint Paul iti Quezon City.
Ni Harmony, PRO ti GUMIL Metro Manila manipud idi 1990 agingga idi 1998, ket anak da Maria Rosa Cabie, agdama a direktor ti GUMIL Metro Manila, ken Honor Blanco Cabie, Opinion and Foreign News Editor ti Manila Standard, ken tubo ti Pinili, Ilocos Norte.
